Обединетото Кралство ќе испрати ракетни системи за повеќекратно лансирање во Украина за да помогне во одбраната од Русија, изјави во средата британскиот министер за одбрана Бен Валас, пренесува Си-Ен-Ен.
Велика Британија ќе испрати лансери М270 кои ќе можат да гаѓаат цели до 80 километри (49,7 милји), нудејќи „значително зајакнување на способноста за украинските сили“, се вели во соопштението на британското Министерство за надворешни работи.
Потегот е „тесно координиран“ со одлуката на САД да ѝ дадат на Украина од нејзиниот артилериски ракетен систем со висока мобилност (HIMARS) – варијанта на ракетните системи со повеќекратно лансирање што ќе ги подари Обединетото Кралство, се додава во соопштението.
„Велика Британија стои со Украина и презеде водечка улога во снабдувањето на нејзините херојски трупи со витално оружје што им е потребно за одбрана на нивната земја“, рече Валас.
„Како што се менува тактиката на Русија, така мора да се менува и нашата поддршка за Украина. Овие високо способни ракетни системи за повеќекратно лансирање ќе им овозможат на нашите украински пријатели подобро да се заштитат од руската брутална употреба на артилерија со долг дострел, која силите на Путин неселективно ја користеа за да ги срамнат градовите“, додаде тој.
Британската влада исто така соопшти дека украинските војници ќе бидат обучени во Обединетото Кралство како да ги користат системите , за да може да се максимизира ефикасноста на ракетите системи.
Подготви: Д.Мишев
