Последниот „медиумски манипулативен хит“ на Плусинфо насловен: ФИЛИПЧЕ И ЗАЕВ СИ ГИ ЛАДАТ НА ЈАХТА НА ХАЛКИДИКИ Венко тренира да го џитне сидрото да влече напред на локалните избори, каде што се објавени фотографии од поранешниот премиер и лидер на СДСМ, Зоран Заев, актуелниот претседател на опозициската СДСМ, Венко Филипче и кандидатот за градоначалник на Аеродром, Александар Трајановски, е класичен пример за нарачана пропаганда маскирана како вест. Без автор, без потпис кој е фоторепортерот, без одговорност – а тоа отвора прашања: кој го пишува овој текст и во чие име?
Додека во Скопје, покрај пеколното време, се вжештува и политичката дебата пред кампањата за локалните избори, актуелниот и поранешниот лидер на СДСМ, Венко Филипче и Зоран Заев, предизборно си ги ладат на луксузна јахта на брегот на Егејското Море…, пишува на анонимниот текст, колумна, репортажа, соопштение на одредена партија… (не знамеме) на Плусинфо, објавено во недела, односно на 10 август 2025 во 20:31 часот.
Последниот медиумски напис за наводната „луксузна дружба“ во Халкидики е уште еден пример како сензационализмот и манипулативните наративи се користат за политичка дискредитација во пресрет на локалните избори што ќе се одржат на 19 октомври и (2 ноември втор круг). Текстот има јасна цел да ги прикаже кандидатите на СДСМ како незаинтересирани, елитистички и оддалечени од реалните проблеми на граѓаните – што е класична стратегија во предизборна борба.
„Ексклузивниот пловен објект е на Зоран Заев и е закотвен на третиот крак
На „клунот“ на јахтата е Венко Филипче и веројатно тренира да го џитне сидрото да влече напред. Позади, кај моторот, е неговиот ментор Зоран Заев. Да се знае кој е моторна сила на партијата и кој дејствува од заднина.
… Трајановски е зафатен со „делкање“ на ручекот, што веројатно го платил главниот спонзор“, пишува меѓудругото анонимниот автор.
Наместо информирање, текстот гради слика преку сарказам, навредливи квалификации и инсинуации без докази – „си ги ладат на јахта“, „џитне сидрото за локалните избори“, „делкање на ручекот“, „ексклузивниот пловен објект е на Заев“ – фрази што не нудат факти, туку спин и пропаганда.
Од „вилата“ до „јахтата“ на Заев – стара пропаганда во ново руво
Да потсетиме, и во декември 2020 година, ВМРО-ДПМНЕ ширеше лажни вести со помош на одредени македонски медиуми и бугарскиот портал Биг5 кој објави „ексклузивни фотографии од новото прибежиште на премиерот Зоран Заев“, дека наводно има вила на Халкидики, Грција.
Анонимниот текст на Плусинфо го споделиле медиумите блиски до власта. Курир го објави текстот и го сподели на својот Фејсбук профил со коментар: Предизборно ладење на Венко и менторот. ФОТО: Заев и Филипче фотографирани на луксузната јахта на Заев на Халкидики.
Текст е дел од предизборна стратегија за дискредитација, користејќи емоционално обоен јазик, симболика и потсмев за да го подрива имиџот на противничките кандидати.
„Филипче и Заев си ги ладат на јахта на Халкидики“ – намерно употребена колоквијална и потценувачка фраза за да создаде слика на недостапен луксуз и безгрижност во контраст со состојбата дома.
„Венко тренира да го џитне сидрото да влече напред на локалните избори“ – саркастична алузија дека активноста на јахта е поврзана со политички планови.
„Што се потврдува и од приложеното“ – ироничен коментар за тврдењето дека Заев не се меша во политика.
Детално опишани „позиции“ на јахтата („на клунот е Венко, кај моторот Заев“) за да се симболизира кој е „моторната сила“ и кој е „од позадина“, односно на граѓаните им се приложува „кој е газдата на СДСМ“.
Фотографии се користат како доказ, но со наративно толкување кое го насочува читателот кон одредена перцепција. Поврзување на трето лице (Александар Трајановски) со истата сцена, и притоа потсмевање на неговата активност („делкање на ручекот“). Алудирање дека „главниот спонзор“ плаќа – имплицитна порака за клиентелизам.
„Ние“ и „тие“ реторика: „Некој си ги лади на јахта… а ботовите… нека се пењават и ломотат“ – создава поделба меѓу „луксузерите и богатите“ и „загреаните“ во партијата.
Предизборната трка одамна се води и надвор од официјалната кампања – на теренот на медиумската пропаганда. И таму, како и на избирачките места, победува оној што подобро ја насочува перцепцијата, а не оној што има повеќе факти.
