УТРИНСКИ КОЛУМНИ
Не беше тешко да се предвиди дека стратегијата на Софија за блокирање на евро-интегративниот пат на Македонија ќе предизвика (најмалку) две крупни последици за самата Бугарија.
Едната е тоа што европската иднина на Македонија е темелно блокирана, со дополнителна компликација што тоа го носи за вториот дел од „тандемот“, Албанија. Навистина, геополитичката, економската и општествената штета од однесувањето на Бугарија е огромна пред сѐ за нас и за Албанците, но ваквата груба бугарска интервенција во евро-американската стратегија за Балканот ја става Софија во позиција да биде централен проблем, а не дел од решението за таа стратегија. И тоа проблем кој сите го третираат како ирационален и непринципиелен, чии регионални безбедносни последици само уште повисоко ќе го зголемуваат притисокот врз Бугарија до точка до која ќе видиме до каде е подготвен нашиот источен сосед да ја доведува и својата регионална позиција во прашање, читајте во новата колумна на Сашо Орданоски „За Бугарија, по стоти пат: врзете ги појасите!“
ЦИВИЛ со осуда на секој облик на креирање и ширење дезинформации и омраза по било која основа и на било кој начин
ЦИВИЛ, како организација за човекови права и слободи, која во континуитет спроведува мониторинг на општествените и политичките процеси, како и на дезинформациите и говорот на омразата. Организацијата остро го осудува секој облик на креирање и ширење дезинформации и омраза по било која основа и на било кој начин.
ЦИВИЛ ги повикува сите граѓанки и граѓани да пријавуваат дезинформации и говор на омразата преку онлајн Граѓанска пријава, како и во директна комуникација со организацијата.
НАСТАНИ
САМИТ: Заменик претседателот на Владата задолжен за економски прашања, координација на економските ресори и инвестиции Фатмир Битиќи ќе престојува во Црна Гора, каде ќе има средби со потпретседателот на црногорската Влада, Дритан Абазовиќ и со министерот за финансии и социјална грижа, Милојко Спајиќ.
Битиќи, како што соопштија од неговиот кабинет, ќе учествува на „Самитот на шефови на влади на Централно Европската иницијатива“.
ПАНЕЛ: Пет амбасадори од Вишеградската група – Чешка, Унгарија, Полска и Словачка, како и амбасадорот на Словенија, земја актуелен претседавач со Европската унија, акредитирани во Република Северна Македонија ќе учествуваат денеска на панел-дискусија на Универзитетот Американ Колеџ Скопје на тема „Иднината на Европа – еден поглед од земја-кандидат за членство во ЕУ“.
Како што информираат од УАКС, настанот е дел од големата паневропска иницијатива „Конференција за иднината на Европа“ во која првпат можност за учество добиваат и македонските граѓани, односно студентите од УАКС, преку поддршката од унгарското претседателство на Вишеградската група.
На панелот ќе се обрати проф. д-р Марјан Бојаџиев, провост на УАКС а панелисти се амбасадорот на Унгарија Ласло Иштван Дукс, на Чешка Мирослав Томан, словачкиот амбасадор Хенрик Маркуш, полскиот Војциех Тицињски, и словенечкиот амбасадор Милан Предан.
ОДБРАНА: Во касарната „Гоце Делчев“ во Скопје, ќе се одржи свечена церемонија за промоција на новите офицери – потпоручници од 21та класа и свечена заклетва на 25-тата класа на питомци на Воената академија „Генерал Михаило Апостолски“.
На свеченоста, според најавата од МО, ќе присуствуваат врховниот командант и претседател на Република Македонија Стево Пендаровски, министерката за одбрана Радмила Шекеринска, началникот на Генералштабот, генерал потполковник Васко Ѓурчиновски и останати високи гости од Министерството и Армијата.
ПРЕЗЕНТАЦИЈА: Директорот на Дирекцијата на ТИРЗ Јован Деспотовски денеска ќе ги презентира резултатите од сеопфатната анализа на ефектите од странските вложувања во технолошко индустриските развојни зони во изминатите 10 години, што првпат ја спроведе ТИРЗ.
-Големата анализа опфаќа повеќе параметри, како вкупни приходи, број на вработени, продуктивност, плати, уплати во Буџетот, нето приходи, и поврат на инвестиции. Анализата, меѓу другото, покажува дали државата и инвеститорите имаат бенефит од вложување во зоните, кои се научените лекции и кои се идните правци за новата македонска развојна економија, велат од ТИРЗ.
Дел од најавите во овој текст се од сервисот на МИА.
Д. Мишев