„Намалувањето на родовиот јаз во платите на макроекономско ниво, може да придонесе за поголем економски раст. Еднаквост на пазарот на труд може да ја поттикне мотивираноста, охрабреноста и вклучувањето на жените, како и да ја зајакне нивната улога во управувањето со ресурсите во домаќинството, што е значајно за долгорочниот раст на економијата. Резултатите од панел-анализата го потврдуваат ова теоретско стојалиште: намалување на родовиот јаз во платите за 10 процентни поени, би придонело кон раст повисок за околу 1% на годишно ниво“, е заклучокот кој произлегува од најновиот Бриф за политики, што го објави Finance Think – Институт за економски истражувања и политики.
Целтралното прашање на овој бриф е – Дали поголем родов јаз во платите му нанесува штета на растот на економијата?
Со анализата се предлага зголемување на минималната плата, воведување калкулатор за фер плаќања, флексибилни форми за работа на мајки, сет од фамилијарни политики, мерки и активност за вклучување на жените на пазарот на труд и зголемување на нивните вештини за работа.
„Коефициентот пред родовиот јаз во платите е негативен и статистички значаен. Во просек, пораст на родовиот јаз во платите за еден процентен поен, доведува до намалување на растот на БДП по глава на жител за 0.08 до 0.11 проценти. Од останатите променливи, очекувано, поголемите вложувања во здравството влијаат позитивно врз растот, како што влијаат и инвестициите во фиксен капитал“, стои во анализата.
Овој бриф за политиките е дел од напорот да се аргументира дека родовиот јаз во платите (во Македонија) треба да се намалува, за што беше предложен и сет од мерки, соопштуваат од Институтот.
„Кога ќе се земат во предвид карактеристиките како образование, стаж и возраст и во кое занимање се профилираат родовиот јаз се зголемува на 17,3 проценти. Кај населението пак, со најмногу основно образование, овој јаз достигнува до 28 проценти. Тоа значи дека жените за работа со иста вредност заработуваат помалку од мажите “, изјави за ТВ Алсат-М, Благица Петрески од Finance Think.