„Германија ја потврдува поддршката за вашата земја на нејзиниот пат кон евроатлантската интеграција, што е во согласност со веќе дадените изјави на високата претставничка на ЕУ, Федерика Могерини и на еврокомесарот Јоханес Хан. За да се постигне ова, неопходно е брзо формирање влада која ќе биде посветена на спроведување на реформите од Препораките на Прибе. Реформскиот процес е важен, бидејќи на луѓето им треба работа, социјална сигурност, владеење на правото и борба против корупцијата. Исто така, ги повикуваме сите актери да се воздржат од покренување прашања за поделби, кои не се однесуваат на овие приоритети“, порача денеска во Скопје, Кристијан Хелбах, специјалниот претставник на германското Министерство за надворешни работи.
Тој вчера и денеска се сретна со претседателот Ѓорѓе Иванов, со министерот за надворешни работи Никола Поповски, како и со лидерите на политичките партии кои се застапени во парламентот, порачувајќи им на сите учесници да се однесуваат одговорно, со цел да се избегнат тензии.
„Ние сме уверени дека претседателот Иванов ќе покаже мудрост, ќе ги почитува резултатите од неодамнешните избори и ќе овозможи мнозинството во Собранието да формира влада што е можно поскоро“, изјави Хелбах.
Тој ја потенцираше „големата важност“ на Специјалното јавно обвинителство, кое треба да продолжи со својата работа „во соработка со независно и веродостојно судство“.
Меѓу другото, тој изрази загриженост и за негативната реторика кон невладините организации и меѓународната заедница, и апелираше партиите да се воздржат од вакви изјави во иднина.