Меморијалниот центар на Холокаустот создаде уште една ѕвезда на бескрајното небо, именувана „Да не се заборави“. Вредните и креативни Корчагинци, заедно со нивните професори, за прв пат оваа година, во соработка со меморијалниот центар на Холокаустот, го организираа овој настан во четвртокот, 26 април 2018. Идејата доаѓа од повеќегодишна соработка со Yad Vashem и меморијалниот центар на Холокаустот кој се одвиваше во реализација на друг вид на проекти. Така, всушност започнува приказната „Да не се заборави“. Тоа е приказна која има за цел да ги поврзе Корчагинци со училиште во Тел Авив, со кое би оствариле една вистинска мултикултурна соработка.
Приказната за Евреите е приказна која на различни начини е раскажувана од значајни мислители, уметници, културни и научни дејци, ширум светот. Но, нашата Корчагинска приказна е приказна која во една атмосфера на љубов, креативност, професионалност и високи човечки принципи на почитување ја исткаевме заеднички за да кажеме гласно пред целиот свет, пред очите на нашата јавност „НИКОГАШ ДА НЕ СЕ ЗАБОРАВИ“! Молкот е поголем непријател и од непријателот. Евреите ја носат пораката на самонадминување, кодот на националниот геноцид, но и Сизифовската издржливост во смисла на нечовечноста применета врз човека, за да ни ја раскажат истата како една возвишена философија која човекот треба да ја запамети, да ја меморира.
„Март е, пролет, време кога на календарите се бележи времето на празниците, посветени на радоста и на обновата на природата, а не време на замолк, не време на смрт…“ („Светилка за Ханука“, Томислав Османли).
Кое е чувството кое би се поврзало со синтагмата „соголување на човечноста“? Зошто помалку вредни луѓе; зошто помалку вредна нација? Кој е всушност човекот?, се дел од прашањата кои беа допрени со овој настан. Не смееме да го заборавиме големото срце на директорот на меморијалниот центар на Холокаустот, Горан Садикаријо, кој во целост застана и ја поддржа идејата на целиот наш Корчагински тим, нашите драги Корчагинци и професорите-ментори: Атанас Сопотски, Валентина Костовска, Митра Блажевска, Сашо Ливрински, Драгица Солунчева, Гордана Геческа, Маја Богданова Христова, Роза Никодиноска, Татјана Голчева.
м-р Митра Блажевска
професор по македонски јазик и литература во СУГС „Раде Јовчевски Корчагин“
