ЖАРКО ТРАЈАНОСКИ
По написот објавен во „Независен весник“ на 10.11.2021, Ана Петровска го аминувала гасоводот низ парк-шумата Водно во 2011 година?, кандидатката за градоначалник на Скопје од „Зелен Хуман Град“ доби новинарско прашање во врска со гасоводот на кое одговори:
„Што се однесува до гасовод, јас немам никаква допирна точка со гасоводот. Тој проект го водеше, во тој период додека јас бев државен секретар, господинот Јани Макрадули“, изјави кандидатката за градоначалник Ана Петровска.
Да видиме дали првиот дел од изјавата на Петровска („јас немам никаква допирна точка со гасоводот“) ја поминува елементарната проверка на фактите.
„Допирна точка“ меѓу Ана Петровска како експерт и гасоводот кој поминува низ Водно има констатирано не само „Независен весник“, туку и „Радио МОФ“ уште во 2018. Во написот „Без да знае, биологот Бранко Мицевски се најде во Студија за гасоводот на Водно“, тема е студијата „за оцена на влијанието врз животната средина (ОВЖС) за делница за гасоводот, чија траса е планирано да минува низ Водно“, а во содржината има линк до документот со следново објаснување:
„Ако се погледне документот, таму пишува дека одговорен експерт е Магдалена Трајковска Трпевска, генералниот менаџер на „Технолаб“. Понатаму, раководител на тимот за изработка на Студијата е Љубомир Ивановски, а Мицевски е впишан во листа заедно со Ана Петровска, Митко Караделев, Андријана Велјаноска, Марјан Ѓуровски и Бранкица Костова.“
Линкот од документот води до сајтот на Општина Кисела Вода, каде што е објавена „Студија за оцена на влијанието врз животната средина на проектот – Национален гасификационен систем во Република Македонија, Делница 5 Скопје – Гостивар – Кичево“, и точно е дека сите споменати имиња се наведени во студијата.
На листата на „соработници“, прва е спомената „Ана Петровска, дипл. инж. архитект, – Експерт за оцена на влијанието на проектите врз животната средина“, што значи дека сепак има допирна точка помеѓу „Ана Петровска“ и гасоводот кој поминува низ Водно.
Новинарот на „Радио МОФ“ побарал изјава од нарачателот на студијата – Министерството за транспорт и врски, кое изјавило „За нас е важно да биде содржана комплетната документација, со потпис и печат, со сите соработници и фирми што работеле на тој проект. И ние како таков сме го прифатиле.“
Во статијата на „Радио Моф“ се објаснува дека за еко-активистите од иницијативата „Го сакам Водно“ студијата била спорна „зошто не го обработила детално влијанието на трасата низ заштитената Парк-шума Водно“. Има и линк до „поопширна анализа околу гасоводната делница низ Водно“, од страна на иницијативата „Го сакам Водно“, во која исто така се критикува студијата:
„Во студијата за оцена на влијанието врз животната средина на проектот се наведува дека избраната траса бара минимална експропријација. Најголемиот дел од трасата низ Водно е државно земјиште. Но, минимална експропријација не смее никогаш да биде причина за избор на траса, особено кога тоа значи градење низ заштитено подрачје.“ [Анализа] Граѓанските иницијативи остануваат против изградба на гасоводот низ Водно“
Во написот Ана Петровска го аминувала гасоводот низ парк-шумата Водно во 2011 година? исто така се цитира анализата потпишана од повеќе организации: Го Сакам Воднo, О2 Коалиција, Зелено Тафталиџе, Стоп на Загадувањето, ЕкоКарпош 3,2,1, Спас за Водно, Ние сме Карпош 4, Скопје Смог Аларм, Сакаме Аеродром да дише. Покрај укажувањето дека „Еко-активистите во 2018 бараа нова траса и нова студија“, написот во „Независен весник“ ги поставува следниве прашања од јавен интерес:
„Каков бил нејзиниот придонес во една ваква студија, колкав бил нејзиниот хонорар и зошто учествувала во изработка на студија, која бројни еко-здруженија ја напаѓаат треба да одговори токму Петровска“.
Но, Петровска досега нема дадено одговор на овие прашања, ниту пак се огради од студијата во која стои нејзиното име како соработник и експерт (како што претходно направи еден од соработниците). Студијата, на која се наоѓа и името на експертката Петровска, изведува генерален заклучок дека изградбата на гасоводот низ Водно, „нема да доведе до значително намалување на квалитетот на животната средина“.
Tокму затоа, легитимни се прашањата на новинарите дали студијата и експертите ја „аминувале“ трасата на гасоводот низ парк-шумата Водно во 2011, исто како и аргументите на еко-активистите кои не беа задоволни од студијата и бараа нова студија „поради пропустите кои ги има за овој дел на заштитеното подрачје Парк-шума Водно“.
Накусо, Ана Петровска досега не објасни како нејзиното име како експерт се нашло во студијата за оцена на влијанието врз животната средина на проектот за гасоводот кој поминува низ парк-шумата Водно. Нејзината изјава „јас немам никаква допирна точка со гасоводот“ не ја поминува проверката на фактите, затоа што нејзиното име како експерт се наоѓа на Студијата за оцена на влијанието врз животната средина на проектот – гасовод кој поминува низ Водно.
Оваа студија, заедно со имињата на сите соработници и фирми што работеле на тој проект, била прифатена од Министерството за транспорт и врски, кое не е само нарачател на студијата, туку и надлежно министерство за проектот – гасовод кој поминува и низ парк-шумата Водно.
По критиките од еко – активистите, Министерството за транспорт и врски направи промени на проектната документација, и трасата беше делумно изменета.
—
П.С. Едит: И Јани Макрадули ја посочи Ана Петровска како една од авторите на студијата:
„Ана Петровска е една од авторките на Студијата за оцена на влијанието врз животната средина на проектот за Национален гасификационен систем во Република Македонија Делница 5 Скопје-Гостивар-Кичево (Гасоводот на Водно) од 2011 година. Студија направена во 2011 во многу тишина и зад очите на јавноста. За таа траса, одобрена и препорачана од Петровска, дека не влијае штетно на природата, граѓанските организации реагираа, а во координирана акција на неколку владини институции во 2018-та година: Од првичниот проект, направена е измена на трасата, и со тоа за 70% се намали должината каде се сечеа дрвца.“, објави на својот Фејсбук профил Јани Макрадули, кој беше спомнат во вториот дел од изјавата на Петровска.
