Големи толпи Израелци излегоа на улиците во неделата, започнувајќи национален штрајк и широки протести зсо барање владата да обезбеди ослободување на 50 заложници кои сè уште се во Газа.
Како што пренесува Си-ен-ен, во една од најголемите координирани демонстрации од почетокот на војната во Газа пред речиси две години, демонстрантите блокираа главни патишта, затворија приватни бизниси и организираа собири во големите градови.
Луѓето протестираа и пред домовите на владини министри. Организаторите проценуваат дека стотици илјади луѓе учествувале во штрајкот низ целиот Израел.
Денот на протестите започна во 06:29 часот наутро, точното време кога Хамас го започна својот смртоносен напад врз Израел на 7 октомври.
Членовите на семејствата на заложниците, кои го предводеа штрајкот заедно со Октомврискиот совет, кој ги претставува ожалостените семејства од војната, одржаа прес-конференција во Тел Авив, најавувајќи „итна пауза“ додека заложниците не бидат ослободени.
„Денес, сè запираме за да ги спасиме животите на 50 заложници и војници. Денес, сè запираме за да се потсетиме на врховната вредност на светоста на животот“, рече Анат Енгрест, чиј син Матан е заложник во Газа.
Анкетите постојано покажуваат дека големо мнозинство во Израел поддржува договор за прекин на огнот за ослободување на сите заложници во замена за крај на војната. Последната рунда преговори пропадна кон крајот на јули, кога САД и Израел ги повлекоа своите тимови од разговорите во Доха, обвинувајќи го Хамас дека не преговара со добра намера.
„Обединети сме во едно едноставно барање упатено до израелската влада: Денес ставете израелски предлог на маса за сеопфатен договор – за крај на војната во замена за враќање на последниот заложник. Без слогани, без саботажи, без барања за кои знаеме дека другата страна нема да ги прифати“, рече Вики Коен, чиј син Нимрод е заложник. „Време е да се стави крај на ужасниот кошмар во кој живее целата земја 22 месеци.“
Штрајкот беше најавен минатата недела, по одлуката на израелскиот кабинет за безбедност да ја прошири војната и да го преземе градот Газа, и покрај предупредувањето на израелската војска дека операциите би можеле да ги загрозат 50-те преостанати заложници во Газа, од кои се верува дека 20 се уште се живи.
Израелската војска вели дека операцијата ќе започне „наскоро“, а владата вели дека ќе му обезбеди на локалното население шатори пред да ги премести „за нивна заштита“. Речиси целото население во Газа е раселено, а многумина се принудени да се преселуваат повеќе пати.
До раните попладневни часови во неделата, израелската полиција соопшти дека 38 демонстранти се уапсени низ целата земја поради нарушување на јавниот ред и мир.
Најголемата работничка организација во Израел, Хистадрут, не се придружи на штрајкот, иако ги охрабри работодавците да им дозволат на работниците да учествуваат. Но, многу технолошки компании, адвокатски фирми, академски институции и претпријатија од приватниот сектор го објавија своето учество и поддршка, заедно со граѓаните кои изјавија дека ќе земат слободен ден или ќе се воздржат од деловни трансакции.
Израелскиот претседател Исак Херцог изрази поддршка за семејствата на заложниците, додека го посети централниот собир на Плоштадот на заложниците во Тел Авив. „Сите луѓе во Израел се вознемирени, загрижени и сакаат заложниците да се вратат дома. Нема ниту една израелска жена или маж што не ги сака дома“, рече Херцог.
Но, членовите на израелската влада го критикуваа денот на протестите.
Премиерот Бенјамин Нетанјаху на состанокот на кабинетот изјави:
„Оние кои денес повикуваат на прекин на војната без пораз на Хамас не само што го зацврстуваат ставот на Хамас и го одложуваат ослободувањето на нашите заложници – тие исто така гарантираат дека ужасите од 7 октомври ќе се повторат одново и одново.“
Итамар Бен Гвир, крајно десничарскиот министер за национална безбедност, рече дека штрајкот бил „циничен политички маневар на грбот на заложниците“, поврзувајќи го со долгогодишното антивладино протестно движење.
Форумот за заложници и исчезнати семејства, кој ги претставува повеќето заложници што остануваат во Газа, одговори:
„Можете да продолжите да се криете зад спинови и политички пресметки, но не можете да избегате од одговорност.“
Форумот објави планови за поставување протестен камп на границата со Газа наречен „Паточка 50“ – што ги претставува 50-те заложници – за да продолжи да врши притисок врз владата да обезбеди нивно ослободување.
Д. Мишев
