Техничкиот премиер Талат Џафери во однос на протестите на пет државни универзитети рече дека тие доцнеле со доставување на нивните барања за колективни договори, за разлика од Универзитеот „Св. Кирил и Методиј“ кој го доставил барањето одма после последните избори. Тој вели дека во време на избори не може да се пристапи кон нови колективни договори и дека затоа решението е да продолжи постапката по изборите.
-Решението е да се чека да се завршат изборите. Собранието е основач. Собранието ниту е политичка партија, ниту е личност. Собранието е државна институција и тоа највисок орган. Во кој било формат после изборите продолжува процедурата започната по однос на барањата. Кој и да е претседател на Собранието и кој и да е составот на наредното мнозинство ќе мора да го овласти претседателот на Собранието затоа што актуелниот после избори физички нема време тоа да го прави. Во време на избори не може да пристапи кон ова, значи решението е да продолжи постапката по изборите. Имајќи предвид дека искуствено оние слабости што ги имаше барањето на УКИМ веќе се надминати затоа што имаа сите примерок од содржината како треба да изгледа целината на договорот што го имаа од УКИМ како пример, им го дадов уште таму кога беа кај мене, така што полесно ќе може да се заврши процедурата, истакна Џафери на денешната прес-конференција.
Додаде дека тие не биле дискриминирани, туку сето ова се случува поради тоа што немале формирано навремено синдикати, односно немале самостојни синдикати, туку некои од нив биле членови само како општи синдикати на МОН. Во однос на тоа премиерот го даде примерот на Универзитетот „Мајка Тереза“ како најнов универзитет, коишто формирале синдикат откако им било укажано за тоа од негова страна.
Членовите на синдикатите на петте државни универзитети „Гоце Делчев“- Штип, „Св. Климент Охридски“ – Битола, Државен Универзитет во Тетово, „Св. Апостол Павле“ и „Мајка Тереза“ во Скопје во понеделникот организираа протести каде што побараа потпишување на колективен договор на овие универзитети и изедначување на правата, обврските и одговорностите со Универзитетот „Св. Кирил и Методиј“-Скопје. Тие го поздравија потпишувањето и спроведувањето на колективниот договор на Универзитетот „Свети Кирил и Методиј“ од Скопје, но истовремено укажаа на нееднаквиот статус на останатите пет јавни универзитети во земјата. Сметаат дека се игнорирани и дискриминирани од Владата и Собранието во однос на УКИМ, чии вработени со потпишаниот колективен договор од овој месец ќе добијат зголемување на платите за околу 22 отсто.
Пратеникот од редовите на ДУИ, Арбр Адеми, во однос на ова прашање вчера изјави дека со оглед на актуелната ситуација кога не може да се потпише колективен договор со универзитетите, пратениците од владејачкото мнозинство до Собранието поднеле измени на Законот за високото образование, со кои, се очекува, да се регулира коефициентот за исплата на плата на вработените во јавните високообразовни установи. Тој очекува дека законот да биде донесен во текот на оваа недела на пленарна седница.
Коалицијата „Вреди“н вчера исто така одржа прес-конференција во врска со ова прашање посочувајќи дека со оставање на пет јавни универзитети вон колективниот договор, и како резултат на истото без зголемување на платите за 22 проценти, Џафери ја навредува интелектуалната елита.
Харис Сулејман