„Срамота е ова што го прават“- си шепотеше Дума на седницата со другарчето Милев, кога со низа аргументи, барем тие мислеа дека држат вода нивните објаснувања, Државната изборна комисија образложи на барањето на јавноста, или поточно малку панично се обиде да ја демантира изјавата на Бејли.
И да не останат должни кон јавноста, со бајаги задоцнување го објавија правилникот на нивната веб страница, по кој се „наградија“, и одлуката за надоместок, откако пресметаа која сума е пристојна да ја прикажат, без да бидат премногу шиканирани од јавноста?
Не се проблем парите, и не е проблем дали тие биле распределени законски. Проблемот е за кого и за што се наменети бонусите и наградите.
За прекувремено работење?
Успешно завршената работа?
Душевна болка од притисокот на јавноста?
За спорведување избори што се кредибилни и демократски?
За носење одлуки?
За одговорност и транспарентност?
Или можеби дека Бејли така фино ги оцрни, ги фати во небрано, или што би рекла Бонева, можно е Бејли да има дезинформации, ама еве уште чекаме информација дали воопшто му се обратиле и го прашале што така јавно? – да не им е нешто лут?
Седница-демант.
Добро Дума. Ти држи и тебе вода дека треба да е побитен Извештајот на ДИК за спроведените локални избори. Ама што ново ќе известите што веќе јавноста не знае!?
Дури, слободно може да се каже дека граѓанките и граѓаните знаат и повеќе од она што вие ќе го приложите пред Собранието.
Да не се повторуваме. Да, трошите, трошлии сте. Дека имате право да се лутите? – е баш немате! Допрва да глумите хуманитарци? Доцна е за лудило.
Дека со драго срце ја препуштате наградата, не знам како истото не ве опна додека го перевте образот во вторникот?
Сеедно, одговорност пред сè. Оставките најверојатно ќе ги сонуваме. Не се будали. А одговорноста, најверојатно ќе ја бараат првин од друго место и ќе речат дека имаат право.
Дека тие не се, нели најкорумпираните, најголемите криминалци… има пред нив уште многу.
Или како што вели Чичаковски имате право да се буните, ама не докрај.
Па не може видните членови на ДИК да одговараат за нестручноста на стручната служба.
И така сè ќе спласне до следните избори, кога како и секогаш, веќе ќе е доцна.