Благица Димитровска од Здружение за промоција и развој на инклузивно општество „Инклузива“, Куманово, во разговор за ЦИВИЛ Медиа истакна дека лицата со попреченост воопшто или многу малку се заштитени затоа што спаѓаат во категорија на граѓани што можат да дојдат во допир со Ковид-19 односно со лице што може да биде заразено со короона вирус.
„Досега немаше сет на мерки за граѓаните со попреченост. Секаде се спомнуваат оние медицински дијагнози што се ризични, но ги нема граѓните со попреченост, 90% од нив имаат пропратна хронична болест. Во оваа група граѓани спаѓаат и луѓето со ретките болести кои досега воопшто не се спомнати. Ги прашувам надлежните дали оваа група граѓани повторно е заборавена кога е исто така во голем ризик. Постојат многу иницијативи од граѓански здружение каде што се реагира на децата и родителите чии деца се со попреченост, а се во работен однос, да се ослободат од работа“, изјави Димитровска
„Најголем дел од лицата со попреченост од мали не примале вакцини и се поизложени на вирусни заболувања. За овие лица обично се грижат родиделите кои доколку се во работен однос можат да бидат изложени на вирусот и како носители да го пренесат на своите деца… Во дневните центри има вработени луѓе кои се стручни лица. Сега гледаме во општините дека се нуди поддршка на стари лица, изнемоштени лица во домашни услови со носење на храна. Лицата со попреченост што живеат сами не можат ни да зготват храна сами. Луѓето што би донеле храна, ако бидат повикани или се обезбеди мерка за нив, воопшто не се обучени ниту за комуникација со оваа категорија на граѓани, ниту за поддршка. Затоа е добро овие стручни лица да се искористат за поддршка на лицата со попреченост во домашни услови.
Што со личните асистенти? Дали тие ќе можат да даваат 24 часовна поддршка на лицата со попреченост, некои од нив се и цели семејства со попреченост што воопшто не смеат да излезат надвор. Прашањето од самите лица со попреченост и нивните родители е нивното здравствено лекување и лекарствата, што дел од нив ги користат добени од страна. Како државата ќе преземе мерка овие лекови да ги набавува и да ги доставува до семејствата. Дел од тие лекови се многу скапи и се со конзилијарно мислење од тим на специјалисти. Тоа конзилијарно мислење истекува за една година дали тоа ќе се продолжи, на начин на кој продолжуваат да важат личните карти и други документи…. “, се само дел од проблемите што ги наведе Димитровска, а ги мачат лицата со попреченост во оваа вонредна состојба и ризикот од Ковид-19.
Димитровска, посочи дека барем во Општина Куманово мерките не се почитуваат, оној дел со шетање по гратскиот кеј со мали деца, како ништо да не се случува. Таа додаде тека се потребни поригорозни мерки за заштита од корона вирусот и поголема ажурност на иниституциите. Таа порача Центрите за социјална работа да излезат на терен, да видат на кои ризични категории им е потребна помош, вклучително на ризични групи лица со попреченост и да им се обезбеди бесплатна храна и лекови.
Биљана Јордановска
