Директна закана со убиство денеска му беше упатена на Џабир Дерала. Во коментар на неговата колумна „Снајперисти со врзани очи“, од профилот „Александар Антиќ“ беше напишан коментарот:
„Биди видлив гнидо, куршумот кај и да е ќе те стигне“
На профилот стои дека се работи за лице кое се претставува како правник и дека е од Скопје. Повеќе податоци не се откриваат во профилот за оние што не му се Фејсбук пријатели.
Говорот на омраза, навредите, како и заканите по животот на колегата Џабир Дерала се интензивирани во последно време, што се совпаѓа со периоди кога во земјата се одвиваат важни настани или процеси.
Дерала е мета на говор на омраза и закани по животот и во контекст на руската брутална инвазија против Украина од проруски, антизападни и националистички профили на социјалните мрежи.
Мониторинг тимот на ЦИВИЛ ја издвојува оваа закана како вистински опасна по животот на колегата Дерала, но треба да послужи и како илустрација, бидејќи не е единствена.
Воедно, ЦИВИЛ ја потсетува јавноста и надлежните институции, во прв ред МВР и ОЈО, дека колегата Дерала е под континуиран напад и од дел од медиумите, вклучувајќи и телевизии кои емитуваат програма на национално ниво, блиски до антизападните политички ентитети и центри на моќта и надвор од земјата.
Неговото име често го споменуваат во негативен контекст и со говор на омраза и високи политички функционери и шефови на политички партии од десницата.
Во моментов, Дерала го тужат шефот на ВМРО-ДПМНЕ и директорот на ТВ Канал 5, близок до десницата, за текст објавен во порталите каде што е главен уредник, односно за изречен збор и вредносен суд во негова колумна.
Обидите за дискредитација и говорот на омраза насочени кон Дерала кои доаѓаат од високи политички претставници и од медиумите, претставуваат дополнителен поттик и реална закана за животот на колегата Дерала.
ЦИВИЛ апелира до надлежните институции да преземат законски дејствија за заштита на животот на колегата.
Мониторинг тим на ЦИВИЛ
