Една од поистакнатите активисти на проруската „пешадија“ која шири пропаганда, лажни вести и дезинформации е и Фејсбук профилот кој, според објавените податоци на самиот профил, ѝ припаѓа на директорката на МИТ Универзитет – Скопје, Билјана Апостолова.
Таа постојано е активна на социјалните мрежи, коментира и споделува пропагандни содржини кои ја оправдуваат руската агресија врз Украина. Една од лагите што ги објави е објавата на лидерот на партијата Родина, Владимир Трајковски, на порталот „Freeglobe.mk“ (кој е еден од изворите што шири руска пропаганда во земјава) дека наводно во Мариупол има био лабораторија на НАТО.
Профилот Билјана Апостолова, во неколку наврати, сподели фотомонтажа од лидерот на Украина, Володимир Зеленски, во која држи дрес со нацистички симбол со порака дека „ова не е фотомонтажа“, и дека ги „жали Украинците“.
Но, лажната фотографија на украинскиот претседател Володимир Зеленски како држи дрес со свастика е раширена од про-руски профили. Ако се побара на Гугл пребарувачот ќе се види дека оригиналната фотографија Зеленски ја објави на својот Инстаграм профил пред Еврокупот во 2020 година.
Директорката на МИТ Универзитетот сподели статус на својот Фејсбук профил дека ќе „ги исклучи порталите што шират омраза и рекламираат оружје“. Еден нејзин поддржувач Зоран Коцев вели дека нема да ги блокира особено ЦИВИЛ, оти на нив се „празнел“, додека Апостолова му реплицира „ти се празниш, ама ние ќе полниме зандани“.
Меѓутоа, директорката Апостолова не само што не ги блокира тие кои „рекламираат оружје“, туку таа всушност и промовира оружје – руско.
Инаку, директорката на МИТ Универзитетот во Скопје, пред да стане силна поддржувачка на Русија и Путин, таа пред неколку години ги поддржуваше НАТО и ЕУ.
Инаку, Јавното Обвинителство на 5 октомври 2016 година во Универзитетот МИТ како високообразовна институција кој е формиран во 2007 година, во чиј состав спаѓаат Факултетот за менаџмент и Факултетот за информатички технологии, спроведе претрес на трите деловни објекти на „МИТ“ универзитетот во Скопје, како и куќата на сопственичката Билјана Апостолова и домот на нејзините родители во Македонски Брод. Обвинители од Основното јавно обвинителството со изготвен налог, инспектори од Управата за јавни приходи и од Министерството за образование, ја барале целата документација поради сомневање дека МИТ работел незаконски. Исходот од таа истрага не ѝ е познат на јавноста.
ЦИВИЛ Мониторинг тим
