Мешовитиот парламентарен комитет Северна Македонија ЕУ утре во Скопје ќе го одржи 19 состанок, со којшто ќе копретседаваат Соња Мираковска од македонскиот Парламент, и европратеникот Андреас Шридер, пренесува МИА.
Според информациите од Европскиот парламент, главни теми на состанокот ќе бидат владеењето на правото, прашања поврзани со животната средина и здравјето, граѓанското општество и медиумите, добрососедските односи и регионалната соработка, а најавен е и извештај за сработеното во рамки на Жан Моне процесот.
Се очекува европратениците во Скопје да разменат ставови во врска со односите меѓу ЕУ и Северна Македонија со претставници на на Владата на Северна Македонија, со претставници на на Европската комисија и European External Action Service.
Засега од Собранието е потврдено дека европратеникот Шридер ќе копретседава со состанокот, но се уште не се потврдуват имињата на останатите европратеници кои треба да допатуваат во Скопје. Европратениците пред почетокот на состанокот ќе имаат средба со спикерот Такат Џафери, како и поединечни средби со координаротите на пратеничките групи во македонскиот парламент и тоа со Јован Митрески, координатор на СДСМ, Никола Мицевски, координатор на ВМРО-ДПМНЕ, Арбер Адеми од ДУИ и Илире Даути од Алијанса за Албанците.
Состанокот, според агендата започнува на пладне а на него ќе присуствуваат и ќе имаат свои обраќања, заменик-претседател на Владата задолжен за европски прашања Бојан Маричиќ, министерот за надворешни работи Бујар Османи и амбасадорот Дејвид Гир, шеф на Делегацијата во Република Северна Македонија, во име на Европската служба за надворешни работи и Европската комисија.
Средбата, која ќе има три сесии, се очекува да заврши доцна попладнето.
