„Статуафест или Другото лице на улицата е интернационален уличен уметнички фестивал кој што ќе се одржи на 14 и 15 септември, од 18 и 30 часот, па сè до полноќ. Ќе се одржи на улица Македонија, во Скопје, и овој фестивал го правиме со цел да го доближиме ваквиот вид на уметност до граѓаните на оваа земја, бидејќи кај нас е многу ретко застапена и сметам дека нашето здружение „Театроск“, коешто го организира овој фестивал, е можеби единственото здружение кое што се занимава со ваков вид на уметност овде кај нас“, вели Милена Цветановска од здружението „Театроск“.
Фестивалот финансиски е поддржан од град Скопје, а спонзори на фестивалот се винарската визба „Тиквеш“, ресторанот Меана Б и ЦИВИЛ. Настанот е во организација на здружението на граѓани „Театроск“.
Милена вели дека целта на фестивалот е да се воспостави едно поинакво доживување во овој град, и дека овој фестивал се разликува од останатите фестивали по неговиот формат, односно по живите статуи. Оваа година покрај учесниците на различни уметници од Шпанија, Украина, Бугарија, Србија, акцент ќе се даде и на артистите од Македонија кои се занимаваат со ваков вид на уметност кои произлегле од работилниците на „Театроск“, под ментроство на Војо Цветановски.
Здружението на граѓани „Театроск“ од Скопје за актот „Контрабас“, оваа година освои прво место од гласањето на публиката на интернационалниот натпревар за живи статуи кој беше дел од музичкиот фестивал „Зигет“ во Будимпешта.
„Ние настапувавме 7 дена. Знаевме дека ќе гласа публиката, гласаа последните два дена од фестивалот и на последниот ден организаторката го соопшти името на „Театроск“ дека всушност „Контрабасот“ на „Театроск“ ја освоил првата награда од публиката. Искрено бевме во шок, и јас и Војо, и ни требаше ден или два за сето тоа да спласне и да ја прифатиме победата, и да ја донесеме овде во Скопје“ додава Милена.
За тоа како е да се биде уличен уметник во Македонија, Милена вели дека тоа значи една борба поради тоа што ваквиот вид на уметност тука сè уште не е добра пласирана, се развива од година во година и дека една од борбите на „Театрос“ е да им се покаже на граѓаните дека и ваквиот вид на уметност е прифатена насекаде надвор, и дека треба да се прифати и кај нас.
„Кога треба да направам паралела помеѓу уличниот уметник овде и во Европа можам да кажам дека во Европа е многу поголема конкуренцијата за разлика од овде, но исто така има поголеми можности за соработка и за презентации, но се надевам дека со тек на време дека кај нас сето тоа ќе се промени и дека конечно овој уметнички израз ќе си најде свое место и во земјава.
Ангела Петровска
камера и монтажа: Биљана Јордановска
фотографија: Маја Ивановска
