„Во моментов, сите штрајкуваме, но не знаеме кому се обраќаме и никој не одговара на нашите барања и пораки. Имаме пратеници коишто два месеца се избрани и седат дома, немаме влада, имаме растрчани пратеници, така што целата ситуација е прилично апсурдна и бесмислена“, рече на на панел-дискусијата „Меѓу чеканот и наковалната: Медиумите и новинарството во изборниот процес“, што се одржа минатата недела во организација на ЦИВИЛ – Центар за слобода, новинарката Гордана Дувњак, долгогодишен уредник во „Нова Македонија“ и во „Утрински весник“, осврнувајќи се на актуелните состојби во медиумите на МПМ, кои од средината на овој месец се во штрајк.
Анализирајќи ја состојбата во македонските медиуми, Дувњак рече дека тие „не можат да бидат поразлични од општиот контекст во државата… Она што ни се случува последните години, е дека луѓето не сакаат да гледаат телевизија и да читаат вести и тоа го сметаат како добар начин за лична деконтаминација“.
„И целата таа поделеност со години, се отсликува и во медиумите. И кога разговарате со некого, сфаќате дека професионалното новинарство е колатерална штета, а последните години е и многу непопуларно. Затоа што луѓето се навикнаа и тоа беше дел од една стратегија, да гледаат на медиумите како на два разделени фудбалски табора. Па, сега, едните навиваат за сините, другите за црвените момчиња. Секоја вистина се покрива со контравистина… И каде е тука вистинската информација? Луѓето ќе ви речат: ‘Лажат и едните, лажат и другите’. Не може обичниот граѓанин да утврди што е вистина, затоа што се пласираат две различни вистини“, оцени Дувњак.
Таа ги акцентираше тешкотиите во работата, при остварување на професионалните заложби да се обезбеди балансиран пристап во информирањето за време на изборите.
„Од партијата на власт ни беше кажано, дека не се заинтересирани за печатен медиум. Така што, ако нив ги нема во електронските медиуми, и се присутни само во некои пријателски медиуми, а останатите имаат проблем да ги обезбедат, во печатените медиуми е уште потешко. И она што можете да го добиете како повратна информација, е да имате среќа е да ви ‘најдат’ некој носител на листа, којшто ќе го имате за интервју“, забележа новинарката Дувњак.
Камера: Атанас Петровски
Монтажа: Моника Талеска