Што е погрешно во предлогот на Владата за издвојување средства со кои ќе се подмират долговите на општините?
Прво, не се базира на анализа на генералната состојба на локалната самоуправа (потребата од постоење на над 80 општини, големата разлика во големината, структурата и капацитетите на општините, развојните перспективи на општините, соодветноста на територијалната поделба, …)
Второ, не ги зема предвид заклучоците и препораките на поголем број истражувања на фискалната децентрализација во кои се потенцира потребата од намалување на зависноста на општините од централната власт и зголемување на самостојните приходи на општините со кои ќе можат да располагаат и да ги остваруваат надлежностите предвидени во Законот за локална самоуправа.
Трето, не се видливи критериумите врз основа на кои е определена конкретната сума и врз основа на кои ќе се врши распределба на средствата на одделни општини. Тоа што е блокирана сметката на некоја општина воопшто не значи дека по автоматизам баш таа општина треба да добие помош од централната власт. Пред да бидат доделени средства на конкретна општина потребно е да се утврди:
- Колкави се приходите на таа општина и дали тие приходи со нормално трошење се доволни за задоволување на конкретните потреби?
- Како се трошеле парите во изминатиот период (дали имало одлевање на пари за прослави, трошоци на администрацијата, непокриени трошоци, непотребни договори на дело и сл.)?
- Дали има непотрошени пари кои се префрлаат од една во друга година?
- Дали се направени погрешни проекции на прибирањето и трошењето на парите?
- Дали има слабости во собирањето на даноците за кои е надлежна општината?
- Дали има контрола над трошењето на парите?
- Дали се правени ad hock пренамени на средства?
Откако ќе се испита сето ова, ќе се утврди дали соодветниот градоначалник треба да биде казнет или пак треба да му се даде помош која му е потребна.
Во спротивно, и понатаму ќе се таложат проблемите кои произлегуваат од несоодветната територијална поделба, општините ќе имаат надлежности кои не соодветствуваат на приходите кои можат да ги остварат и ќе бидат наградувани оние кои крадат и лажат, односно ќе бидат затскривани нивните грешки, незнаење и пропусти. Или, поинаку кажано: АМНЕСТИЈА (не помирување) и не само на финансиски план, туку многу, многу веројатно и на кривичен план!
Доброто управување со општината е она што се очекува од градоначалникот и локалната власт. Програмите и ветувањата на градоначалниците и претставниците на локалната власт мора да се базираат на објективните ситуации во општината и да го имаат предвид реалното, а не замисленото. Кога се пишуваат програмите и кога се даваат ветувањата се посочуваат токму проблемите со кои се соочува општината, се идентификуваат слабостите и се тврди дека тој кој што го бара гласот на граѓаните знае и може подобро.
Тоа значи и дека секое оправдување дека актуелните проблеми се резултат на претходната власт и нејзиното недомаќинско работење, претставува само потврда дека актуелната власт лажела кога ја барала довербата на граѓаните. Лажела дека знае како да ги реши проблемите, лажела дека има капацитети да се справи со проблемите и лажела дека може да испорача подобри решенија.
Секоја помош која доаѓа од страна на централната власт со која не се земаат предвид сите аспекти на остварувањето на власта на локално ниво, претставува поддршка на лажењето и крадењето и манипулацијата на граѓаните.
Кој лаже тој…
Објавено и во Плусинфо и Слободен печат
Преземање на содржините НЕ Е ДОЗВОЛЕНО, освен со писмена дозвола од ЦИВИЛ. Повредата на авторските права е забранета со закон.
Услови за користење, авторски права и заштита на приватноста
