Загубата од 10 милиони евра не го спречило АД Пошта да исплати огромни износи за менаџерско осигурување за 7 директори на акционерското друштво кои истовремено се дел од Управниот и Надзорниот одбор, стои во последниот ревизорски извештај на ДЗР за 2018 година.
Според извештајот на ДЗР, платено е менаџерско осигурување за период од 1.04.2018 до 1.04.2019 година во вкупен износ од 2.760.000 денари, или околу 45.000 евра, додека во истиот период е забележана загуба од 10 милиони евра.
Директорите на акционерското друштво ги бира Владата, а доколку Надзорниот одбор одобри може да се склучи договор за нивно менаџерско осигурување со осигурителна компанија.
„Со полисите за осигурување, при настанување на осигурителни случаи, се предвидени исплати на оштета на осигурените лица. Во услови да не настанат договорените случаи на осигурани настани, платениот износ на премијата на осигурување, во процент од 89,5, се исплатува на сметка на осигурениците, наместо на сметка на поштата која извршила плаќање на премијата на осигурување“, пишува во ревизоркиот извештај.
Ревизорите одговорноста за овој ревизорки извештај ја лоцираат кај Фадис Реџепи генерален директор и претседател на УО од 1.09 2014 до 31.08. 2018 и кај Ејуп Рустеми кој е генерален директор и претседател на УО од 1.09.2018 година.
Покрај овие во извештајот на ДЗР се наведени и низа други нерегуларности како што е вработување на лица со средна стручна спрема на позиции наменети за вишо или високо образование. Понатаму, вработувањата се направени согласно колективен договор кој е во спротивност со Законот за работни односи.
Ревизијата утврдила и дека во текот на 2018 година вработените несовесно постапувале со земени аванси и не вратиле околу 16.000 евра во касата на АД Пошта.
„Со анализа на старосната структура на побарувањата утврдивме деа 10 проценти од нераздолежените аванси потекнуваат од 2018 година, 65 проценти се побарувања од 2017 година, 4 проценти од 2015, 17,5 проценти од 2014 и 3,5 проценти од 2013 година“, се вели во Извештајот.
Ревизијата констатирала и дека во 2018 година АД Пошта извршила продажба на градежен објект/деловен простор во нејзина сопственост без да пресмета и наплати данок на додадена вредност.
Согласно констатираните состојби ревизијата се воздржува од давање на мислење за финансиските извештаи за 2018 година, а изрази и неповолно мислење за усогласеноста на активностите, финансиските трансакции и информации, рефлектирани во финансиските извештаи со релевантната законска регулатива, упатства и воспоставени политики.
М. И.
