Офанзива на СДСМ за Законот за Јавно обвинителство, се бара мнозинство од 80 пратеници без ВМРО-ДПМНЕ за започнување на собраниската процедура. Зоран Заев најави дека законодавниот дом нема да се распушти сѐ додека не заврши процесот на изјаснување во Собранието. ВМРО-ДПМНЕ и понатаму го опструира процесот на донесување на овој закон. Клучна улога, по сѐ изгледа, ќе имаат помалите парламентарни партии како и независната пратеничка група од ВМРО-ДПМНЕ за да се постигне потребното мнозинство. По денешните билатерални средби на министерката за правда Рената Дескоска со претставници на овие партии и групи ќе се знае конечното расположение за изгласувањето на Законот за Јавно обвинителство во Собранието.
Од седумте закажани седници на собраниските комисии две се одложија. ВМРО-ДПМНЕ и ДУИ не се појавија на седницата на Комисијата за политички систем каде требаше да се расправа за предлогот за продолжување на рокот за застарување на делата од два на три пати подолго од предвидената законска казна. Со нивното отсуство, интегративците и пратениците од ВМРО-ДПМНЕ оневозможија потребен кворум за отпочнување на седницата. Кирацовски на прес конференција извести за ваквото однесување на двете партии и потврди дека ова однесување оди во прилог на многу “поранешни и актуелни функционери” кои се засегнати во делата процесирани од СЈО.
Втората одложена седница беше онаа на Комисијата за култура поради „ различни ставови околу кворумот односно кој може да биде заменик член за да учествува во работата на ова собраниско тело“. Комисијата за култура на дневен ред ги имаше Предлог-заклучоците од надзорната расправа што ја организираше во март минатата година на барање на опозицијата, за културните политики и начинот на донесување на Годишната програма на Министерството за култура за проекти од национален интерес, со посебен осврт на реализацијата на Програмата за 2018 година.
Во фокусот на денот се најде и сведочењето на поранешниот премиер, Зоран Заев, за случајот „Монструм“. Заев одговараше на прашања од родителите на убиените момчиња и изјави дека не поседувал, ниту пак видел какви било докази за вмешаноста на Трајко Велјаноски во случајот Смилковско езеро. Заев потврди дека неколкупати се сретнал со роднини на убиените момчиња, кои сакале да добијат повеќе информации од „бомбите“. На една од средбите, дел од родителите изразиле сомневање дека правосудниот систем крие од нив информации и докази. Тој им презентирал аудио материјали кои ги побарале, без да им даде копија. За тоа што јавно не ги објавил материјалите, Заев рече дека единствена причина била што сметал дека не постои целовитост за создавање целосна слика, и затоа на крајот решил, сѐ што поседува, да не биде објавено, туку да биде доставено до СЈО, за тие да ги употребат за докажување на вистината за „Монструм“ пред судот.
Маја Ивановска
