Европскиот парламент го усвои извештајот за Србија, со 419 гласови „за“, 113 гласови „против“ и 88 воздржани. Така, тоа стана резолуција, која нема правно обврзувачки карактер.
Авторот на извештајот, известувачот Тонино Пицула, за време на дебатата во Стразбур изјави дека, и покрај одреден напредок во економијата, Србија се соочува со големи пречки, пред сè во областите на владеењето на правото, политичкиот дијалог, борбата против корупцијата и усогласувањето со надворешната политика на Унијата, јавуваат српски медиуми.
Дебатата се одвиваше првенствено со критички тон кон српското раководство поради недостатоците и бавните реформи на патот кон Европската Унија.
Вака пратениците се осврнаа на падот на настрешницата во Нови Сад, а многумина ја истакнаа својата поддршка за студентите во Србија, бидејќи велат дека се залагаат за европски вредности.
Исто така, порака имаше и од европската комесарка Марта Кос, која рече дека решавањето на одредени проблеми и реформи не само што ќе ја доближи Србија до ЕУ, туку ќе ги реши и внатрешните проблеми и поделби.
Една од темите на дебата беше посетата на претседателот на Србија на Москва на 9 мај, која беше најавена завчера, а вчера беше реализирана. Во оваа смисла, Тонино Пицола рече дека пораките на српското раководство за посветеност на европските интеграции се неубедливи. Друг пратеник рече дека 9 мај треба да се слави како „Ден на Европа, а не како парада на Путин“.
Против тоа мнозинство, имаше и неколку пратеници, првенствено од десничарската политичка група „Патриоти за Европа“, кои сметаат дека извештајот на Тонино Пицула е пристрасен и дека не ги одразува сите позитивни резултати што Србија ги постигнала по патот.
По усвојувањето на овој извештај, кој стана резолуција, известувачот на ЕУ за Србија,Тонино Пицула одржа прес-конференција, кој истакна дека нема да има скратени патишта за Србија во процесот на пристапување кон Европската Унија и дека се очекува клучен напредок во основните права, дијалогот со Приштина и усвојувањето на санкциите против Русија.
„Раководството на Србија тврди дека Европската Унија е главната цел за таа земја. Покрај тоа, тие неодамна изјавија дека Србија ќе биде подготвена да се приклучи кон Унијата дури и пред 2027 година, но реалноста покажува нешто сосема друго“, рече Пицула.
Инаку, дебатата од галеријата во парламентот ја следеа неколку студенти од Србија кои учествуваа во штафетниот ултрамаратон, каде што тргнаа од Нови Сад и се упатија сè до Брисел, со цел да им пренесат пораки на европските елити за тоа како ја гледаат ситуацијата во Србија и што се случува во Србија.
Д. Т.
