Експлозија на бомба пред клиника за плодност во Калифорнија уби едно лице, а четири други беа повредени во „намерен терористички чин“, соопштија претставници на ФБИ, пренесува Би-би-си.
Експлозијата се случила непосредно пред 23:00 часот по локално време на помалку од една милја од центарот на Палм Спрингс, во близина на неколку бизниси, вклучувајќи го и Американскиот репродуктивен центар (ARC). Клиниката соопшти дека никој од објектот не е повреден.
ФБИ подоцна соопшти дека има „лице од интерес“ во својата истрага, но полицајците „не го бараат активно“ осомничениот.
ФБИ на брифингот во саботата изјави дека станува збор за намерен напад.
Шефот на полицијата во Палм Спрингс, Енди Милс, изјави дека експлозијата оштетила неколку згради, некои сериозно.
Тој додаде дека идентитетот на убиеното лице не е познат.
АРК во Палм Спрингс изјави дека експлозијата се случила на паркингот во близина на нивната зграда.
Градоначалникот на Палм Спрингс, Рон Де Харт, изјави за американскиот партнер на Би-Би-Си, Си-Би-Ес њуз, дека изворот на експлозијата „бил во или во близина на возилото“.
Клиниката за плодност изјави дека нивната лабораторија, вклучувајќи ги сите јајце клетки и ембриони, останала „целосно безбедна и неоштетена“.
„Спроведуваме интензивна безбедносна инспекција и потврдивме дека нашите операции и чувствителни медицински области не биле погодени од експлозијата“, се вели во соопштението на клиниката.
Според нејзината веб-страница, клиниката ARC е првиот центар за плодност со целосна услуга и лабораторија за ин витро оплодување (IVF) во долината Коачела.
Нуди услуги како што се евалуации на плодноста, ин витро фертилизација, донација и замрзнување на јајце клетки, репродуктивна поддршка за истополови парови и сурогат мајчинство.
Гувернерот на Калифорнија, Гевин Њусом, изјави дека државата е во координација со локалните и федералните власти, додека американската државна обвинителка, Пам Бонди, изјави дека е информирана за инцидентот.
