Министерот за здравство Венко Филипче ги отфрли тврдењата на опозициската ВМРО-ДПМНЕ дека високи функционери се вакцинирале против Ковид-19.
-Одговорно ви кажувам дека не е вакциниран ниту еден фуницонер, ниту еден министер во Владата, ниту еден директор. Списоците се регрутирани од страна на сите ЈЗУ во кои се лечат или прегледуваат пациенти со ковид, болници, клиники, здравствени домови, приватни здравствени установи, приватно стоматолошки установи, матични лекари и тоа е единствениот налчин на кој луѓето се вакцинираат. Слободно дојдете, уште утре ќе проверам што е тоа што може да се даде како податок, рече Филипче одговарајќи на пратеничко прашање на Миле Лефков од ВМРО-ДПМНЕ.
Објасни дека Националната стратегија за имунизација е правена врз основа на светските критериуми. Консултирани се меѓународни организации, СЗО, други развиени европски земји.
-Ние сме една од ретките земји во која целосно се вакцинирани здравствените работници кои работат со ковид пациенти, пожртвувано 24 часа на ден, цела измината година посебно сега кога цела средна Европа е зафатена од многу силне бран со Ковид-19. Знам дека сакате да не успееме во нашата борба за да освоите некој ефтин политики поен, но ќе ве разочарам, ние оваа борба ќе ја добиеме. Се што значи дозволен пристап на податоци за кои самите граѓани ќе се сложат да ги отстапат своите податоци како дел од своето здравствено досие, дојдете и земете ги, потенцираше Филипче.
Во Националниот план за имунизација се превидени повеќе сценарија, поради тоа што ниту една земја не знаеше со колку вакцини ќе располага. И затоа приотитет имаат здравствените работници.
-Огромен процент од здравствените работници се и ревакцинирани, а од следниот период и почнува ревакцинацијата со руската вакцина. Масовната вакцинација ќе започне на почетокот на месец април и тоа ќе биде дистрибуирана насекаде низ државата и ќе започне со критичните категории на граѓани над 70 години кои имаат хронични болести, рече Филипче.
Обраќајќи им се на опозициските пратеници, тој рече дека тие уште еднаш го покажуваат своето право лице, и оти само лажат, клеветат и шират лажни вести.
-И додека целиот свет се бори вие сте на спротивната страна и ние се бориме и за вакцините и против лажните вести кои вие ги ширите. Вашиот претседател Христијан Мицкоски кажа дека е многу задоволен од третманот на Инфективната клиника, додека зад кулисите ги поткопувате сите можни обиди да се зајакне здарвствениот систем во оваа криза, рече Филипче.
Тој ги потсети опозициските пратеници дека блокирале закони за што каснеле модуларните болници и опремата, како и за блокадата за изградба на нов Клинички центар.
Министерот Филипче потоа во одговор на друго пратеничко прашање, ги отфрли тврдењата за криминални и спорни постапки за набавка на вакцини. Пратеникот Бране Петрушевски од ВМРО-ДПМНЕ обвини дека кинеските вакцини требале да бидат набавени преку фантом фирма со тројца вработени и дека тие требало да бидат купени за двојно повеќе поголема цена.
– Во нашите постапки и набавки ниту има нешто спорно, ниту има нешто криминално, ниту има провизија. Тоа време помина, кога вие раководевте со владата и со здравството, изјави министерот за здравство.
Филипче тврди дека документите што ВМРО-ДПМНЕ ги извади во јавноста се целосно лажни.
-Таков документ од Министерството за здравство не е излезен. Таква фирма не сме виделе, дека таква исплата на таква сума нема. Престанете да лажете, изјави Филипче.
