ЦИВИЛ – Центар за слобода упати писмо, на почетокот на октомври, во кое побара од политичките партии, во духот на транспарентноста на која се законски и морално обврзани, да одговорат на неколку прашања што се однесуваат на финансирањето на нивните кампањи.
Во продолжение одговорите на политичката партија „Левица“, односно на нивниот член, Здравко Савески.
ЦИВИЛ: Како ги финансирате предизборните кампањи?
Савески: Бидејќи Левица е партија која ги застапува интересите на работниците, сиромашните и обесправените, за разлика од останатите партии, нашите предизборни кампањи не ги финансираат газди (под флоскулата на членови и симпатизери, нели). Финансиите за нашата кампања доаѓаат од донациите на нашите членови и симпатизери, кои обично и самите се во лоша материјална состојба, како и од јавното финансирање.
ЦИВИЛ: Како ги финансирате пропагандните материјали и реклами?
Савески: Од парите предвидени за изборната кампања.
ЦИВИЛ: Колку пари чинат подароците за гласачите (пенкала, маици, кафе, балони итн.)
Савески: Ние, поради принципиелни причини, не нудиме ваков вид подароци за гласачите.
ЦИВИЛ: Кои се изворите за финансирање, односно донаторите?
Савески: Одговорив погоре околу профилот на нашите донатори.
Овие прашања се упатени до сите учесници во изборната трка на сите избори, но одговорите изостануваат со години наназад.
Освен, „Левица“, на прашањата одговорија и од партијата на Фиат Цановски, ПЕИ.
„На овие избори нашата политичка партија генерално ги подржува кандидатите предложени од СДСМ, така што немаме издвоена, самостојна кампања“, одговори портпаролот на ПЕИ, Сеадин Џафери.
Што се однесува до двата финансиски извештаја, доставени до Државната изборна комисија, во период од 21 септември до 14 октомври, „Левица“ потрошила вкупно 281.114 денари во изборната кампања.
Биљана Јордановска
