Окружниот суд во Хелсинки го осуди рускиот неонацистички платеник Јан Петровски на доживотен затвор за воени злосторства извршени во Украина, објави финскиот јавен сервис Yle на 14 март, пренесува Кијив индипендент
Петровски, ко-водач на паравоената единица Русич, беше осуден за воени злосторства во Луганската област на 5 септември 2014 година, за време на руската инвазија на Донбас.
Обвинителите презентираа видео докази на кои се гледа како тој наредил и учествувал во егзекуцијата на украинските војници.
Петровски ги отфрли сите обвинувања, но судот пресуди дека видео снимките даваат доволен доказ за неговата вмешаност.
Русич, озлогласена руска неонацистичка група, документирала и објавила докази за сопствените воени злосторства, вклучувајќи тортура и вонсудски убиства.
Украина побара екстрадиција на Петровски, но финскиот суд на 8 декември 2023 година одлучи дека тој не може да биде испратен во Украина, наведувајќи ја загриженоста за условите во затворот според Европската конвенција за човекови права.
Единицата Русич, поврзана со руската групација Вагнер, има долга историја на бруталност. Ко-основачот Алексеј Милчаков се здоби со слава поради објавување слики од суровост кон животните и отворено славење на воените злосторства.
Петровски е под санкции на ЕУ и САД од 2022 година.
Д. Мишев
