пишува: ЏАБИР ДЕРАЛА
Фиромците денеска, на 8 Септември, Денот на независноста, не најдоа причина да слават. Не се потрудија ни да го истераат редот, да се закачат барем на опашките на протоколот и да оддадат почит на починатите македонски претседатели. Не, тие беа на пикник.
Нема ниедна причина да им се придава преголемо значење, но само кога не би биле толку деструктивни и присутни во јавниот и политичкиот живот. И тоа, на сметка на граѓанките и граѓаните на Република Северна Македонија кои денеска слават заедно. Но, тоа не е ни чудно.
Со ниедна постапка и со ниедна изјава не покажаа дека се дистанцираат од злото што ѝ го нанесоа на државата за време на владеењето. Со ништо не покажаа дека не се приврзаници на криминалното владеење. Напротив, нивниот почесен претседател формално, а вистински газда, сѐ уште им е Никола Груевски. Тој, од кого се откажаа и неговите најблиски соработници, кумови и кумашини, па и дел од неговото семејство, затоа што кукавички избега од правдата, иако самиот пишуваше и изјавуваше дека нема. Тој, бегалецот од правдата, сѐ уште владее во грдата шампита со стражарницата, чирот во центарот на Скопје што го уништи за да му пасува на неговите манијакални замисли како треба да изгледа главниот град. И тоа е само еден дел од целата мрачна приказна поврзана со нив…
Се разбира, пионите на, сепак, десеткуваната (азилантска) Фамилија, фиромците, немаа ништо попаметно да направат денеска, освен, за наши пари, да се шетаат наоколу и демонстративно да не учествуваат во прославата на Денот на македонската независност. Тие „славеа“ на свој начин, ама не и за свои пари, туку со пари од буџетот на државата. А пари имаат, многу. И јавни пари лапнаа и многу црни пари имаат. И ги инвестираат во деструкција.
Го блокираат законот за јавните обвинители колку што можат повеќе, ја дискредитираат секоја институција што може да им ја загрози удобноста и да ја наруши нивната веќе децениска неказнивост. Целата шампита, од врвот до подземните гаражи и сите трол фабрики им се впрегнати во попречување на европската иднина на земјата. И прават уште многу лоши работи.
Тоа е повеќе од неодговорност. И бруцош на било кој правен факултет знае што е тоа.
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон. Врз основа на договор за соработка, оваа содржина е достапна за Плусинфо и Слободен печат без ограничувања.