Градоначалникот на Општина Чаир, Висар Ганиу, на денешната прес-конференција информираше дека е загрижувачка состојбата со управување на отпадот и јавните услуги во Чаир. Тој истакна дека граѓаните се изложени на ризик од ширење на епидемии.
-Во 21 век сме, а се давиме во отпадоци. Чаир е дом за над 60 илјади граѓани кои заслужуваат основни услови за живот, истакна Ганиу.
Ганиу напомена дека градоначалничката на Град Скопје, Данела Арсовска не треба да дозволи да биде, како што рече, „инструментализирана од структурите на ДУИ“. Тој повика таа итно да ги ангажира вработените од ЈП „Комунална хигиена“ и притоа испрати критика кон политичките партнери од Сарај за водење на политичка кампања на грбот на граѓаните.
Во своето обраќање Ганиу посочи дека постојат неисполнети ветувања од страна на Градот, односно нереализирани паркови, булевари, бесплатен јавен превоз и инвестиции во Старата скопска чаршија.
-Општина Чаир нема неплатени обврски кон градот. Доколку тврдите спротивно, ве охрабрувам, пуштите извршители и на суд ќе ја утврдиме вистината, рече Ганиу. Тој потенцираше дека Општината останува отворена за институционална соработка и конкретни активности.
На новинарско прашање во врска со дивоградбите во Чаир, Ганиу потенцираше дека доколку постојат нерегуларности, тогаш треба да постапуваат органите, но појасни дека не е коректно сите дивоградби да се бараат во Чаир.
-Ако има нешто, тогаш треба да постапуваат органите, а не градоначалничката да ја игра улогата на истражен орган. Законот за легализација во Чаир се спроведуваше како што се спроведуваше низ целата држава. Близу 500 илјади дивоградби имаше во Македонија кога се донесе Законот. Вкупно 130 имало во 2011 година. Вие сите дивоградби ги барате во Чаир и мислам дека тоа не е коректно. Јас никогаш не сум сакал да се споредувам со други општини, но Чаир не е ни пета ни шеста Општина во Скопје по бројот на дивоградби. Ова што го прави градоначалничката е „шоу“ во Општина Чаир, рече Ганиу.
Фото: Општина Чаир
