Федералниот совет за безбедност на Германија одобри испорака на 40 ловци „Еурофајтер“ на Турција, што претставува значителен напредок во преговорите што траат со месеци, објави германското издание „Шпигел“, цитирано од турските медиуми, пренесе МИА.
Турција сака да купи 40 ловци „Еурофајтер“ во вкупна вредност од околу 5,6 милијарди евра. Сепак, за да се случи продажбата, потребно е одобрение од четирите земји учеснички во програмата „Еурофајтер“ – Германија, Обединетото Кралство, Италија и Шпанија.
Со оваа одлука, Германија отстранува еден од главните проблеми пред склучувањето на договорот за купување на ловците од страна на Турција, коментираше веб-страницата „Туркије Тудеј“.
Синоќа, турскиот претседател Реџеп Тајип Ердоган имаше телефонски разговор за ова прашање со британскиот премиер Кир Стармер, објави ТРТ Хабер.
