Бранко Героски во интервју за ЦИВИЛ Медиа, вели дека на претстојниот референдум на 30 септември, гледа како круна на процесот на приклонување на Македонија кон западната политичка хемисфера и кон ЕУ и НАТО, и дека очекува граѓаните во многу голем број да се изјаснат „за“, притоа свесни за тежината на својата одлука или жртва која Македонија треба да ја принесе, обезбедувајќи ја својата иднина.
Според него, компромисното решение „Ерга омнес, не била лесна одлука и дека политичкиот врв не е пресреќен за таквата одлука, но дека тоа било единственото можно решение после толку долг процес на преговори.
„Јас мислам дека тој процес незапирливо ќе продолжи бидејќи не е ова решавање само на македонското прашање, туку како егзикуција на еден поширок план, а тоа е пацификација на целиот регион, Западен Балкан. Видовме дека овој караван на моќни политичари и луѓето со влијание во политиката, се пресели од Македонија во Србија, каде што се става акцентот, и на сите ние е јасно дека станува збор за генерално средување на регионот, и тоа мора да се заврши, затоа што доволни беа 3 и повеќе децении на немири, војни и нестабилност на регионот и ние за среќа сме дел од тој план“, вели Героски.
Во однос на кампањата за референдумот, Героски вели дека тоа што тој го очекувал не се исполнило до крај, дека кампањата од сите инволвирани страни, како Парламентот, невладиниот сектор и најмногу од партијата на власт, очекувал да биде помалку конфликтна, а повеќе инклузивна.
„Очекував барем еден корпус на луѓе кои се во неумица, на кои не им е лесно да ја прифатат оваа промена, на никому не му е лесно, па и на мене не ми е лесно да ја прифатам таа промена, да им се пристапи со една со една пообјаснувачка кампања. Сè до крајот видов и таков начин на разбирање на овој процес, но мислам дека не беше доволно тоа и мислам дека тоа ќе нè чини еден корпус на гласови помалку на контото на она што ќе дојде за“, вели Героски.
Во однос на кампањата за референдумот и медиумите, Героски вели дека има телевизии каде што гледаме рекламни кампањи и здодевни и бескорисни дебати, со што тој се сомнева дека тие ќе предизвикаат некакво влијание кај граѓаните.
„Мислам дека медиумите одиграа улога согласно со онаа што им беше наменета од организаторите на кампањата, и не можете да очекувате медиумите да водат сами кампањи, бидејќи кампањата ја води тој што за нешто се залага, ние може да им ги отворите вратите и просторот, но кој колку ќе го искористи тоа е прашање право на медиумите“, додава Героски.
Биљана Јордановска
обработка на текст: Ангела Петровска
камера: Дехран Муратов
монтажа: Буњамин Камбери
Видео интервјуто е дел од граѓанската иницијатива „Зачекори напред!“, финансирана од Фондацијата Отворено општество – Македонија. Содржината е единствена одговорност на авторите и на ниту еден начин не може да се смета дека ги изразува гледиштата и ставовите на граѓанската иницијатива „Зачекори напред!“
