Инспекциските служби во Општина Битола, започнаа постапка за изрекување глоба за фирмата „Стентон“ ДОО, која поседува концесија за ископување на минерални суровини и за изградба на каменоломот кај месноста „Билбил Камен“. Глобата е поради продолжувањето со работа и откако фирмата не ја доби Б-интегрираната еколошка дозвола за работа.
„По дадените препораки и инспекцискиот надзор, констатирано е дека концесионерот ДОО ‘Стентон’ продолжи со експлоатација на минерални суровини без Б-интегрирана еколошка дозвола што е спротивно на законот. Поради непочитување на препораките и кршење на законот, исто така, им беше изречена и казна-глоба од инспекциските структури“, изјави денеска советникот од редовите на СДСМ во Општина Битола, Горан Козаров. Тој ги повика вработените во локалната самоуправа да ги почитуваат законите и да не подлегнуваат на притисоците кои, како што истакна, се сè почести.
Во известувањето кое беше презентирано на денешната седница на Советот стои дека на 27 март бил извршен инспекциски надзор на каменоломот и било констатирано дека врши ископ без добиена Б-интегрирана еколошка дозвола. На 31 март повторно бил направен инспекциски надзор, по што било заклучено дека фирмата продолжила со експлоатација. По ова, според информацијата на инспекторот, започнале постапка за изрекување глоба против ДОО „Стентон“.
По одлуката Општина Битола да не ја додели Б- еколошката дозвола за градба, ЦИВИЛ Медиа разговараше со граѓанската организација „За нас се работи“, од каде ни изјавија: „Уште во 2012 година ‘Стентон градба’ доби концесија за геолошки истражувања. Со таа концесија беше предвидено, во период од две години да се направат истражувања и да се произнесат дали ќе бидат концесионери за ископување на минерални суровини. По две години, ‘Стентон градба’ ги доби сите дозволи за градба од надлежните, освен Б-интегрираната дозвола, која треба да ја издаде Општината. Нашиот став е дека целата процедура од Општината е несериозна, во поглед на поднесување на барањето и одговорот што само се одолжува, а за кое време – концесионерот работи. Процесот за давање дозвола е поедноставен и требаше да се одлучи досега, а не да се врати назад кај Министерството за животна средина. Во ред е Општината да врати на разгледување, но концесионерот во тој период да прекине со работа, што сега не е случај. За цел овој период во кој се чека одговор, концесионерот продолжува со работа“.
Каменоломот е само на 800 метри од Битола и нема ниедно мерење што покажува дека нема да ја загадува животната средина.
