Со слоганот „Мораме да го заштитиме граѓанското општество“, денеска, 122 невладини организации побараа поддршка од јавноста, со цел да се зачува слободата на граѓан(к)ите и на граѓанското општество.
Ваквиот апел од невладиниот сектор е реакција на заканите и манипулациите кои ги шири ВМРО-ДПМНЕ, која секодневно испраќа соопштенија во кои се сатанизира граѓанскиот сектор дека е дел од заговор за уништување на Македонија.
„Нападот на граѓанските организации не е само пропагандна вест за која се слуша по медиуми. Тоа е напад врз граѓанското општество, врз честа, достоинството и угледот на граѓани кои тука се родени, живеат, работат, плаќаат даноци, а своите работа и ангажман, професионално или волонтерски, ги посветиле на подобрување на животите на сите граѓани во државава подеднакво“, стои во писмото за поддршка кое го потпишаа 122 организации.
На денешната конференција се обратија Фани Каранфилова Пановска, извршна директорка на Фондацијата Институт Отворено општество Македонија (ФИООМ), Кристина Ампева од Здружението „Гласно“ од Штип, Уранија Пировска од Хелсиншкиот комитет и Зекир Абдулов од „Кхам“ од Делчево.
„За отчетноста и транспарентноста на организациите од граѓанскиот сектор говорат нивните годишни финансиски и наративни извештаи, организациските и проектните ревизии кои отсекогаш биле јавно достапни, како и редовното и темелно комуницирање со јавноста и граѓаните. Граѓанските организации редовно и навремено ги исполнуваат своите обврски кон државата и се залагаат за добро и транспарентно управување во сите сфери на општеството. Оттука, оркестрираните државни контроли на финансиското работење на десетици организации во ист временски период, оставаат впечаток на тенденциозно и намерно вршење притисок, предизвикување страв и нанесување штета врз слободниот граѓански сектор“, рече Каранфилова Пановска.
Таа нагласи дека освен известувањата кои 22-те контролирани организации ги имаат добиено од УЈП, со кои се бара увид во финансиското работење за период од пет години, и освен наводите искажани на прес-конференција од СДСМ, во кои беше кажано дека против 22 организации и 42 физички лица е отворена постапка од страна на службите за финансиско разузнавање, нема други информации дека органите на власта се занимаат со граѓанските организации. Но, и дека нема да бидат изненадени ако ова е дел од една поголема координирана акција.
Таа, исто така, ги повика претставниците на политичките партии, претставниците на Владата, институциите и граѓаните, да ги поддржат организациите кои активно се залагаат за демократските вредности во Македонија.