Секој петок, во утринските часови граѓанките и граѓаните го препознаваат слободниот простор на ЦивилМедиа во „Граѓанскиот форум“ – како завршница на прашањата на денот, и без задршки имаат можност преку коментари да испратат пораки, искуства но и критики до властите, институциите, политичарите, а според досегашните одговори, тие тоа го прават на јасно артикулиран начин, со директни пораки и сугестии.
ГРАЃАНСКИ ФОРУМ (ПРАШАЊЕ НА ДЕНОТ): Што сакате да им порачате на властите?
Што им порачаа граѓанките и граѓаните на властите минатиот петок?
Една од најчестите пораки од граѓаните е оваа власт да си замине, не изостана ниту минатиот петок.
-
Да си заминат од власт.
-
Да си одат ВЕДНАШ!
-
Што побргу да си заминат
Граѓаните им порачаа на властите дека никој не владее вечно па затоа да внимаваат со одлуките и постапките.
– Да не заборават дека Никој Не владеел вечно! Затоа внимателно со одлуките и постапките.
Во пораките на читателите на ЦивилМедиа, ретко се случува да има и говор на омраза или навредливи коментари, како што е случајот со минатиот петок. Редакцијата на ЦивилМедиа љубезно ги замолува читателите да се воздржат од навредливи изрази и говор на омраза, било да се насочени кон други читатели или кон редакцијата. ЦИВИЛ е отворен простор за прашања, одговори, квалитетна дебата од сите граѓанки и граѓани, но не толерира говор на омраза.
Коментарите со навредлива содржина и говор на омраза нема да бидат објавени на медиумската платформа.
Понатаму, граѓаните порачуваат дека сакаа департизација на институциите
Се залагам за департизација, сите кандидати за јавни функции да бидат независни, односно да не мора да припаѓаат на партија, гласи една од пораките.
-
Властите да соработуваат и со другите партии и да почнат да работат за граѓаните.
-
Република Северна Македонија е мултиетничка држава и повеќепартиска, и секој има право на припадност
-
Наместо здравството да се фокусира на решавање на хроничните системски проблеми, се вплеткува во теми што немаат никаква врска со реалните потреби на граѓаните.
-
Наместо образованието да го поправи срамниот резултат на ПИСА тестирањата, се занимава со промоција на поими што не се ни дискутирани со јавноста.
-
Наместо социјалната заштита да биде бастион на помош за ранливите, таа станува полигон за експерименти. Во меѓувреме, народот чека — во болници, во училници, во редици за социјална помош.
Ова се само дел од пораките што граѓаните ги оставија во коментари и пораки на петочниот граѓански форум на ЦивилМедиа.
Целта на петочниот Граѓански форум на ЦИВИЛ е да им се обезбеди на граѓанките и граѓаните безбеден и слободен простор ( каков што впрочем со години е ЦИВИЛ) во кој тие ги изразуваат своите грижи, споделуваат искуства и им порачуваат на властите каде можат да се поправат, каде им се грешките, да прашаат за решенија на евентуални горливи проблеми, а во исто време тие пораки и сугестии да бидат јавни, и неподложни на цензура или прикривање.
Сите прашања на денот може да се најдат во рубриката ФОРУМ на интернет весникот ЦивилМедиа.
Д. Тахири
