Скопје, 11 ноември 2017 (МИА) – Германија и Франција покажаа дека е можно да постои мир помеѓу нации кои претходно војувале меѓу себе и дека тоа функционира, бидејќи не беа во прв план националните интереси, туку заедничките интереси, порача германскиот амбасадор Томас Норберт Герберих на комеморацијата што се одржа денеска на германските гробишта во Прилеп по повод „Денот на примирјето“ и „Денот на народната жалост“, со што им беше оддадена почит на жртвите од Првата светска војна.
– Ги посетивме француските гробишта во Битола, сега се наоѓаме на германските гробишта во Прилеп. Целта е да се потсетиме и да ги споменеме загинатите. Со ова сакаме уште еднаш да воочиме дека е можно да постои мир помеѓу нации кои претходно војувале меѓу себе и да покажеме дека тоа функционира, бидејќи не беа во прв план националните интереси, туку заедничките интереси, рече амбасадорот Герберих.
Како што информираа од општина Прилеп, на германско-француската комеморација се обрати и Кристијан Тимоние, амбасадор на Република Франција.
– Светот сеуште е жртва на насилство, вооружени конфликти и ограничување на слободата. Луѓето страдаат и умираат и се принудени да бегаат. Нашиот одговор на тоа е дека мораме да ја развиваме нашата способност за помирување, порача амбасадорот Тимоние.
Делегациите венци цвеќе положија и на спомениците подигнати во чест и спомен на загинатите бугарски и руски војници во Првата светска војна, чии тела се погребани на германските гробишта во Прилеп.
На комеморацијата присуствуваа и положија венци цвеќе и делегации од Собранието на Република Македонија, од Општина Прилеп, од АРМ, дипломатскиот кор во Македонија и здруженија на граѓани.
Во рамките на одбележувањето, вечерва во Битола, Данги де Дезер, внук на загинатиот полковник Ордиони, учесник во Источниот фронт, ќе ѝ презентира на јавноста дел од активностите за објавување на писмата што неговиот дедо ги напишал на фронтот од 1917 и 1925 година.
Според најавите, во понеделник во хотелот „Епинал“, францускиот амбасадор Тимоние ќе го отвори таканаречениот „научен ден“ посветен на Источниот фронт. На конференцијата што ќе се одржи на тема: „Балканските општества во Првата светска војна“ ќе учествуваат експерти од Македонија, Франција и други држави од регионот.
[divide]
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
