Украинците две години му покажуваат на светот дека битката за мирот е и подалекусежна борба, таа е борба за владеење на правото и правдата, а функционалната демократија е браникот од владеењето на деструктивните режимите со акумулирана моќ, истакна вицепремиерката за политики за добро владеење Славица Грковска, во своето обраќање на мултимедијалната конференција под наслов „Украина – две години хероизам“, во организација на Амбасадата на Украина во соработка со македонската граѓанска организација ЦИВИЛ – Центар за слобода.
„Изминаа две години од бруталната агресија на Русија врз Украина. Денес сме тука да им дадеме поддршка, да им одадеме признание за нивниот непокор. Украинците во овие две години му покажуваат на светот дека битката за мирот, е подалекусежна борба, таа е битка за правото и правдата. Оваа војна уште еднаш покажа дека режим кој убива за да опстои, режим во кој владеат тесните интереси на малкумина, по цена на животите и на својот и друг народ, најмногу е против демократијата и владеењето на правото. Оваа лекција не потсетува колку е важна функционалната демократија.“. истакна Грковска.
Изразувајќи ја солидарноста со Украина, Грковска истакна дека се надева дека не е далеку денот кога ќе одбележиме крај на војната, и дека наскоро заедно со Украина ќе бидеме дел од европското семејство.
Конференцијата се одржува денеска во Музејот на македонската борба за независност. Меѓу говорниците на конференцијата во првиот дел беа и македонскиот претседател Стево Пендаровски, Амбасадорката на Украина Лариса Дир, премиерот Талат Џафери, вицепремиерите Бојан Маричиќ, Славица Грковска, министрите Бујар Османи и Славјанка Петровска и други високи претставници на државните институции.
Во втората сесија на оваа ќе говорат дипломатските претставници на ЕУ, САД, Велика Британија, Шведска, Албанија, Чешка, Франција, Јапонија, Германија, Полска и Литванија.
Во музејот се поставени и две изложби. „Проект Украина: Доживување на војната“, електронска изложба со виртуелна реалност и „Поштенска картичка од Украина“, изложба на фотографии.
Програмата предвидува и промоција на книгата „Украина – години на хероизмот“ од Џабир Дерала.
А. В.
