Се сеќавате дека имаме претседател? Она собно цвеќе, фикусот? Поим за современа декоративна китка?
Не? Да?
Што треба да знаете за фикусот? Освен што е „дебелокожец“ што треба често да го гланцате, многу му е потребно сонце… она на Вергина е најидеално и пружа идеални услови за да расне во височина.
И додека е младо му треба потпора инаку ќе се развие криво!
Предупредување: Треба да внимавате како го полевате да не го правите тоа често бидејќи премногу вода доведува до скапување на растението.
Ви текнува?
Значи, на „убавото“ Водно, во прилично популарна вила, една таква китка израсна криво, разводнета и опсесивно – компулсивна, полирана, па штом ќе светне македонското сонце на слободата ѝ се крева косата во висина.
Во контекст на прошетката на китката до Брисел, за греота е што ЕУ така се однесува. Мислам како и да не биде? Па ние од нејзиното однесување не можеме да пркнеме.
Мислам ни таму ни ваму – статус кво позиција. Значи не оди така. Место да се поигрува со убавиот рај на Фикусот, наречен Македонија, ЕУ итно да прекине да го блокира сонцето што живот дава.
Ок, ќе се разговара за мигрантска криза, затоа што нема други кризи, ни надворешни, ни внатрешни, безбедносни предизвици, економска стабилност и интезивна тет-а-тет соработка, ама јадниот Фикус изгледа дека до толку овенал што не е свесен за непосредната му околина т.е. Македонија.
Ама не е ни крив, додека бил млад криво го раснеле, а во процесот утнале со наводнувањето.
И сега, Фикусот вели дека криви се ЕУ што ни е блокиран патот кон неа, а не тој и неговите стопани, криви се НАТО, Грција и Америка, а за браќата и сестрите од Бугарија нема смисла за нелојалноста, се знае… Тој бара од ЕУ да го деблокира процесот на интеграција, никој друг не е виновен за македонското дно.
Ветување е ветување. Неостварено си е неостварено.
Греота за Китката! Ни самата не очекувала дека толку ќе преживее.
Како и да е, ваквите прошетки не се за потценување, напротив треба да бидат поучни.
Фикусот е убаво и издржливо растение, ама да не заборавиме, собно е…