Канцеларијата на американскиот министер за одбрана Пит Хегсет наредила привремено запирање на летовите за воена помош за Украина на почетокот на февруари без да ја извести Белата куќа, објави ексклузивно Ројтерс.
Прекинувањето наводно влијаело на 11 пратки артилериски гранати и оружје од воздухопловната база Довер и американската база во Обединетите Арапски Емирати.
Наредбата, издадена околу една недела откако американскиот претседател Доналд Трамп го започна својот втор мандат, предизвика непосредна загриженост во Кијив и меѓу службениците во Полска, кои контактираа со Вашингтон за одговори.
Високо рангираните претставници за национална безбедност во Белата куќа, Пентагон и Стејт департментот не биле свесни за одлуката и не можеле да одговорат на прашањата.
Летовите продолжиле на 5 февруари, по тридневна пауза, по наводна интервенција од советникот за национална безбедност на САД, Мајк Валц, рече еден извор.
Ројтерс објави во февруари дека САД накратко ги запреле испораките на оружје за Украина додека новата администрација на Белата куќа дебатирала за своите политики кон Кијив.
Усната наредба наводно потекнува од канцеларијата на Хегсет по состанокот во Овалната соба на 30 јануари за Украина, каде што беше дискутирано за прекинувањето на помошта, но Трамп не го одобри.
Четири лица запознаени со ова прашање за Ројтерс изјавија дека мала група вработени во Пентагон, од кои многумина долго време се противат на американската помош за Украина, го советувале Хегсет да ја прекине помошта.
Претседателот и други високи функционери не биле свесни за прекинот сè додека украинските и европските партнери не изразија загриженост.
Запрашани за коментар за овој извештај, од Белата куќа за Ројтерс изјавија дека Хегсет ја следел директивата од Трамп да ја паузира помошта за Украина, што, како што рече, бил став на администрацијата во тоа време. Не е објаснето зошто, според оние што разговараа со Ројтерс, врвните претставници за национална безбедност во нормалниот процес на донесување одлуки не знаеле за наредбата или зошто таа била толку брзо поништена.
Откажаните летови наводно ја чинеле Транспортната команда на САД (TRANSCOM) 2,2 милиони долари.
Оружјето претходно било одобрено за време на администрацијата на поранешниот претседател Џо Бајден и овластено од Конгресот. Откако започна вториот мандат на Трамп во јануари, не се одобрени нови пакети за помош.
САД привремено ги прекинаа воените испораки за Украина во март пред да ги рестартираат откако Кијив се согласи на планот за примирје за време на разговорите во Џеда на 11 март.
Повеќедневната пауза на летовите, потврдена од пет лица кои се запознаени со неа, исто така покажува конфузија во тоа како администрацијата ја креирала и спроведувала политиката за национална безбедност. Во Пентагон, нередот е јавна тајна, при што многу сегашни и поранешни функционери велат дека одделот е мачен од внатрешни несогласувања за надворешната политика, длабоко вкоренети омрази и неискусен персонал.
Д. Мишев
