И војната во Украина злоупотребена за дезинформациски рафали. Твитер профилот Бојан (Bojan@mordorea) објави фотомонтажа од порноактерот Џони Синс, кој е претставен како Володимир Тимошченко војник кој наводно ја бранел Македонија во 2001 година од „качачките банди“, а денес отиде да ја брани Украина.
Тој во коментар меѓудругото пишува дека Тимошченко (измислениот херој) и покрај Преспанскиот договор, гордо го носи на униформата сонцето од кутлеш..
Дека се работи за лажна вест, покрај лошата фотомонтажа, доволно е да се направи проверка на Гугл и да се открие дека се работи за фотографија на порно-актерот Џони Синс (Johnny Sins).
Твитер профилот Бојан за себе вели дека е анти-комунист, анти-енџио, десничар, но пред сѐ вмровец и Македонец.
ЦИВИЛ – Центар за слобода ги повикува граѓанките и граѓаните да не потпаѓаат на лажни вести и дезинфомации. Како организација за човекови права и слободи и како медиумска платформа, ЦИВИЛ со години будно ги следи состојбите во сферата на хибридните закани против демократијата и информацискиот хаос.
Дезинформациите и теориите на заговорот со години ги разградуваат општествата, ги поларизираат и ги дестабилизираат. Тие им даваат „крилја“ на радикалните структури насекаде низ светот, па така и во Северна Македонија. Дезинформациите, злонамерните и лажните вести, измамата, теориите на заговорот, псевдонауката, пропагандата и низа други појави со кои се внесува дисторзија и јавноста се заведува или се насочува врз основа на интересите на одредени центри на моќта, а не за да се информира, спаѓаат во т.н. информациски нарушувања или, според терминологијата усвоена во ЦИВИЛ, информациски хаос.
Дезинформациите и другите облици на информацискиот хаос предизвикуваат ерозија на демократијата и демократските институции.
Д. Муратов
