Врвните демократи во Конгресот се впуштаат во борба за импичмент со Кристи Ноем, бидејќи дури и некои умерени републиканци велат дека ја изгубиле довербата во шефицата на Министерството за внатрешна безбедност – зголемувајќи го притисокот врз администрацијата поради она што го сметаат за целосен неуспех во Минесота, според Си-ен-ен.
Во заедничка изјава во вторникот, тројцата водечки демократи во Претставничкиот дом објавија дека наскоро ќе поддржат гласање за импичмент на Ноем – што можат да го покренат без никаква поддршка од Републиканската партија – освен ако Трамп веднаш не преземе акција за нејзино отпуштање по фаталното пукање врз 37-годишниот Алекс Прети.
И двајца умерени републиканци – сенаторката Лиза Мурковски, отворената центристка од Алјаска, и пензионираниот сенатор Том Тилис од Северна Каролина – им кажаа на новинарите во вторник дека сакаат Ноем да биде отстранета.
Во еден извонреден чекор за лидерите на демократите во Претставничкиот дом, лидерот на малцинството Хаким Џефрис и неговиот тим издадоа отворена изјава во која се заканија со импичмент по неколку недели обиди да ги одвратат своите членови од такви разговори, што тие во голема мера го сметаа за одвлекување на вниманието со оглед на жестоката лојалност на Републиканската партија кон претседателот.
„Кристи Ноем ја уништи довербата на јавноста во нејзината способност да го води Министерството за внатрешни работи. Таа лажеше за Алекс Прети. Таа беше прекорена од републиканците во Конгресот, од нејзините високи службеници, па дури и од претседателот“, напиша официјалниот профил на „Homeland Dems“ на X. „Таа треба да биде отпуштена, да поднесе оставка или ќе биде импичментирана“.
Во објавата беше цитиран твит од клип на Ноем како ја оцрнува жртвата на убиството, Алекс Прети во бесрамна лавина од лаги. Таа лажно го обвини дека „реагирал насилно“ на федералните агенти и го опиша неговото погубување како употреба на „одбранбени истрели“. Најлошо од сè, таа тврдеше дека тој планирал да ги „масакрира“ органите за спроведување на законот и дека бил вклучен во „домашен тероризам“.
Сите што ги погледнаа снимките видоа дека Прети мирно ги снимал маскираните агенти кога го нападнале, го претепале, го разоружале, а потоа го застрелале повеќе пати, убивајќи го. Ништо од она што го тврдеше Ноем не е вистина. Но, се чини дека Ноем никогаш не била заинтересирана за вистината. Единствено била заинтересирана да ја контролира штетата во име на администрацијата на Трамп и да испрати јасна порака дека федералните агенти се над законот.
Овој пат, се чини дека ICE Барби – како што ја нарекуваат Ноем на социјалните мрежи – ја премина границата за последен пат
Калифорнија предупредува: државата ќе истражува федерални агенти по смртоносни пукања
Во светлината на одбивањето на федералната влада да соработува со државните и локалните истраги за двете неодамнешни смртни случаи од пукотници во кои се вмешани федерални службеници во Минесота, главниот обвинител на Калифорнија, Роб Бонта, заедно со гувернерот Гевин Њусом, издаде билтен со кој ги потсетува државните и локалните полициски структури дека имаат право да истражуваат можни кривични дела според државниот закон, дури и кога осомничени се федерални агенти.
Реакцијата следува по, како што се наведува, одбивањето на федералната влада да соработува во истрагите за две смртни случаи во Минесота поврзани со пукање од федерални службеници. Според Бонта и Њусом, федералните власти не само што не покажале волја за темелна истрага, туку и се обиделе да ги попречат државните и локалните органи да дојдат до докази и местото на настанот.
„Не смееме слепо да прифаќаме федерални наративи, особено кога има смртоносно пукање“, порача Њусом, оценувајќи дека транспарентноста е „законска и морална обврска“.
Бонта нагласи дека федералните агенти немаат апсолутен имунитет од државно гонење и дека Калифорнија ќе покрене обвиненија кога фактите ќе го оправдаат тоа. Министерството за правда на Калифорнија најави правна и оперативна поддршка за локалните служби, вклучително и барање итни судски мерки за обезбедување докази.
Во билтенот се наведува дека државите имаат примарна надлежност за истрага и гонење прекршувања на државниот кривичен закон, а граѓаните се охрабруваат да пријавуваат недолично однесување од федерални агенти преку официјален портал.
Се ближат среднорочните избори кои се најавуваат како катастрофа за републиканците. Доколку демократите ја вратат контролата врз Конгресот, ќе може да ги повикаат сите овие функционери на Трамп на одговорност и да започнат со импичмент и отстранување.
Д. Мишев
ПРОЧИТАЈТЕ И:
