На почеток на корона кризата или поточно 10 март, Владата на предлог на Комисијата за заразни болести донесе заклучок со кој, вработените лица кои имаат малолетно дете со навршена возраст до 10 години или активно четврто одделение, за кого е неопходна домашна грижа, еден родител да биде ослободен од работа и работни активности и неговото отсуство за време на овој период да биде евидентирано од страна на работодавачот како оправдано отсуство.
Со оглед на фактот дека школската година заврши на 10 јуни (тогаш завршува?), на 8 јули 2020 на 74 седница Владата донесе одлука за изменување и дополнување на одлуката за мерките за спречување на ширење на Ковид -19, односно родителите на деца до 10 годишна возраст, вклучени во воспитно образовниот процес, кои беа ослободени од работа, да се вратат на работните места, со оглед дека учебната година е веќе завршена.
Тоа значи дека со започнување на летниот распуст кај децата вклучени во образовниот процес, за нивните родители мерката со која беа ослободени од работа престана да важи, бидејќи и во нормални услови надвор од корона кризата, за време на летен распуст тие родители одеа на работа. Поради што и престана да постои потребата од нивното ослободување.
Но, мерката со која родителите чии деца одат во градинка се ослободуваат од работа остана да важи, поради фактот што градинките останаа затворени и немаше кој да ги згрижи децата додека нивните родители се на работа. Овие мерки ќе останат да важат се до донесување на други одлуки од Владата, кои се очекува да се донесат со отварањето на градинките и започнувањето на школската година.
Министерот за здравство Венко Филипче најави дека на почетокот на следната недела ќе биде донесена одлука дали ќе продолжи да важи мерката за родителите на деца кои сега се ослободени од работа и за хронично болните.
На гостување во емисијата „10 минути“ на ТВ 21, министерот Филипче рече дека во следните денови за ова ќе биде отворена дискусија во Комисијата за заразни болести и оти одлука може да се очекува на почетокот на следната недела.
– Тоа беше одлука за родители на деца заради тоа што се затворија градинките и училиштата, вклучително и за луѓето кои се хронично болни за кои се уште важи мерката. Меѓутоа во следните денови ќе отвориме дискусија најпрво во Комисијата за заразени болести според проценката на ризик во сегашната ситуација на епидемијата и на почетокот на следната недела ќе донесеме одлука дали тоа ќе продолжи да важи или не. Секако дека еден од факторите што ќе се земе предвид е и отворањето на градинките. Тука зборувам за категоријата на родители на деца до 10 години чии деца ќе можат да одат во градинка. Значи, нова одлука и соодветна препорака ќе дојде на почетокот на следната недела, изјави Филипче.
Симона М. Живкова
