Икона против руската војна​

Пишува: Амб. ЛАРИСА ДИР
Вонредна и Ополномоштена Амбасадорка на Украина во Република Северна Македонија

Иконата во православието и католицизмот претставува исклучителен свештен атрибут, особено во православната традиција. Таа има длабоко сакрално значење за верниците и служи како посебна форма на дијалог — дијалог што може да ги излечи раните што Украинците ги трпат и против кои се борат веќе 1165 дена поради руската воена агресија против Украина.​

Овие редови ги напишав инспирирана од една посебна изложба на украинските уметници Софија Атлантова, Олександр Клименко и Герман Клименко, која содржи циклус Богородични икони насликани на кутии од оружје. Овој проект е посветен на украинските деца кои се киднапирани од руските окупатори.​

Украинските деца и мајки се најранливите и најнезаштитените пред воените злосторства на русија. Апсолутна „новела“ на тековниот злостор на рф е тоа што незаконската депортација на украински деца ја спроведуваат претставници на сите гранки на руската власт. Киднапирање, заробување, физичко и морално малтретирање, тортура — тоа е добро организиран државен конвејер на руското зло.​

Идејата на проектот „Икони на кутии од муниција“ — дело на уметници од Кијив — е трансформација на смртта во живот. Кутијата од оружје е симбол на смртта, додека иконата го претставува животот.​

Излегувајќи надвор од религиозниот простор, иконата насликана на кутии од оружје станува разбирлива и далеку од украинската земја, која секојдневно е подложена на ракетни и артилериски напади.​

За време на руската агресија, Украинците научија да оперираат под непријателски напади, да ги едуцираат децата во засолништа и со неверојатна брзина да ја развиваат својата одбранбена индустрија.

Зошто тогаш да не се совлада и создавањето икони на кутии од муниција?​!!!

Секако, таквиот израз на титански отпор не е поради недостаток на традиционални материјали.​

Украинските земји имаат вековна историја на иконопис. И покрај многуте пречки, украинската култура, особено црковната, се развивала во нагорна линија.​

Најпознати и влијателни биле Кијивската и Лвивската школа на иконопис. Украинското иконописство било богато со неколку стилови, меѓу кои најпознати се ренесансата, барокот и класицизмот. Многу странски мајстори го совладале стилот на украинските барокни икони во Кијив.​

Украинските барокни цркви и ренесансно-барокните иконостаси се сведоштва за префинетоста и совршенството на украинското наследство, кое намерно се уништува од рускиот агресор.​

Иконописот на кутии од оружје е нов стил на украинското иконописство, донесен од руската војна.​

Тоа е исто така сила што, на свој начин, го задржува руското воено зло.​

Менталниот отпор продолжува.​

Украина се бори!​

Специјално за ЦИВИЛ Медиа.