Илјадници Израелци протестираат пред официјалната резиденција на премиерот Бенјамин Нетанјаху во централниот дел на Ерусалим, повикувајќи го израелскиот лидер да поднесе оставка по смртоносниот напад на Хамас на 7 октомври што ја поттикна најновата војна меѓу Израел и Хамас.
Нетанјаху досега одбиваше да ја преземе одговорноста за нападот на 7 октомври, кога неколку илјади милитанти на Хамас упаднаа во Израел и убија над 1.400 луѓе, а зедоа околу 240 заложници назад во Газа. Тој вели дека функционерите, вклучително и тој, ќе мора да и дадат одговори на јавноста, но дури по војната.
Израел изврши неколкунеделни воздушни напади и започна копнена офанзива во Газа, при што палестинските здравствени власти соопштија дека во борбите загинале над 9.000 луѓе.
За време на вечерашните протести, демонстрантите го повикаа Нетанјаху да се повлече и повикаа на враќање на заложниците. Тие, исто така, одадоа едноминутно молчење за жртвите од нападот и оние кои се наоѓаат во заробеништво.
„Каде бевте во Кфар Аза“, извикуваа демонстрантите, мислејќи на една од израелските погранични заедници нападната од Хамас.
„Дојдов овде за да ја спасам земјата“, изјави Нава Хефец, рабин и активист за човекови права, кој присуствуваше на протестот.
Г. Т.
