Фондот за пензиско и инвалидско осигурување објави дека зголемувањето на пензиите од 2,9 денари за минималните пензии заначи нивно зголемување за 304 денари, а за просечните 460 денари, пишува Слободен печат.
Најнизок износ на пензии е 9.986 денари, но овие пензии се само дел од групата што Фондот за ПИОМ ја води како приматели со најниски пензии (зависно од годината на пензионирање), а во неа се пензиите од 9.986 денари па се до 12.801 денари. Така, за најниската од најниските пензии (ја примаат 3.185 пензионери), зголемувањето ќе биде 289 денари, а за највисоката најниска пензија (ја примаат 1.664 пензионери) зголемувањето ќе изнесува 371 денари.
Максималните пензии, исто така зависно од годината кога е остварено правото на пензионирање, се движат од 40.548 денари до 57.992 денари. Најниската од најголемите пензии ја примаат 37 пензионери и за нив следува зголемување од 1.176 денари, додека највисок износ на пензија примаат 63 пензионери и тие на 57.992 денари ќе добијат дополнителни 1.682 денари.
Инаку, просечен износ на пензиите во декември бил 15.867 денари и во просек секој ќе земе по уште 460 денари. Вкупниот број на пензионери во декември бил 328.570.