коментира: ЏАБИР ДЕРАЛА
Работа за младите, отстранување на царинските препреки и процедури, нови патишта, железнички пруги и авио линии меѓу Србија и Косово, нормализација на односите, накратко – економијата пред политиката, се дел од нацрт договорот што го понудија американските посредници на првиот ден од косовско-српските преговори во Вашингтон, на 3 септември.
Вучиќ на Инстаграм и дел од неговите ортаци во српската влада на другите мрежи, излегоа со популистички (националистички) пораки. „Мојата порака до сите во нашата преубава Србија е – предавањето никогаш не беше опција! Да живее Србија!“ Видеото е со слаб тон, Вучиќ малку несигурен, така, малку како покакан, па неопходен е транскрипт за да се разбере што зборува. Но, тоа може и да се очекува, и самиот во изјавата вели дека се наоѓа на неколку десетини метри од Белата куќа.
Што е работата? Точката 10 во документот што го понудиле американските посредници се однесува на взаемно признавање меѓу Србија и Косово за да се направат можни и економските мерки за просперитет на регионот. Српските политичари, откако се сликаа насмеани со американските посредници во српско-косовските преговори, излегоа пред медиумите велејќи дека притисокот врз нив бил силен и агресивен, но дека тие „нема да се предадат“, дека „се борат“ и слични типично балкански изјави на „херојство“.
Ричард Гренел, пратеникот на американскиот претседател, на тоа одговори со краток твит: Not true. (Не е вистина.) Изгледа дека толку и заслужува оваа најнова акробација на Вучиќ, кој се удира в гради (тивко) дека нема да се предаде, иако никој тоа од него не го ни бара.
Приказна за себе се медиумите. Српските наслови се шарени, но голем дел говорат за извонредните можности што ги пружа договорот. Дел од македонските наслови – „посрпски“ од српските, би рекол, повеќето од првите сто наслови на оваа тема на 3 август може да се сведат на: „Вучиќ брутално го одбил американскиот предлог да го признае Косово!“
Зоран Заев повлече нога. Балканот се стабилизира. Извесно е дека ќе дојде до нормализација, а можеби и до меѓусебно признавање на Косово и Србија. Ако не во Вашингтон, тогаш во Брисел, каде што се селат преговорите на 7 септември. Аирлија!
