На денешната прва пленарна седница по одморот на пратениците треба да биде разгледана интерпелацијата на претседателот на Собранието Африм Гаши, за прв пат во овој парламентарен состав.
Интерпелацијата е поднесена од пратеничката група на Левица, а според распоредот на силите и најавите кој како ќе гласа,, поддршка ќе даде опозициската СДСМ, додека ВМРО-ДПМНЕ и коалициониот партнер „Вреди“ нема да дадат поддршка, додека од ДУИ нема прецизен одговор. Неофицијално интегративците на Ахмети на почетокот на седницата ќе го искажат ставот зошто и што му забележуваат на Гаши и ќе ја напуштат собраниската без да гласаат,со што се мали шансите интерпелацијата да добие мнозинство.
Интерпелацијата, Левица ја засноваа на 7 точки во 10 страници каде според нив собранискиот спикер работел нестручно, неуставно и неделовнички, но и како што наведуваат ја повредил секуларноста на државата бидејќи дозволил извршување на верски обреди на една од седниците на комисиите . Во забелешките е наведен и случајот со косовската претседателка Вјоса Османи на скопскиот аеродром за што Гаши исто така посочи пак дека реагирал со цел да избегне инцидент а останатите прашања повторно ги адресираше на МВР. Според Левица, Гаши како претседател на Законодавниот дом направил и повреда на употребата на македонскиот јазик затоа што заклетвата, како веќе избран претседател прво ја дал на албански, а не на македонски јазик. Во интерепалцијата е наведено дека спикерот го злоупотребил и Законот за државни симболи .
Опозицијата ќе ја искористи можноста и да говори за скандалот со сватовите и свадбата на Косово.
Интерпелација е регулирана во Деловникот на Собранието. Право да ја образложи интерпелацијата на седница на Собранието има еден од пратениците што ја поднеле интерпелацијата, во траење од 20 минути, додека субјектот на кого му е поставена интерпелацијата има право да го образложи својот писмен одговор или да даде устен одговор на поставената интерпелација, во траење од 20 минути.
Претресот по интерпелацијата трае еден работен ден до исцрпувањето на листата на пријавените пратеници за збор, а се одлучува најдоцна до 24,00 часот.
За да биде разрешен функционер потребна е поддршка од 61 пратеник.
Во изјава за телевизија „Сител“ дадена вчера Гаши рече дека би сакал секој пратеник да гласа и да одлучи по свое сопствено убедување.
– Интерпелацијата е демократска алатка што ни овозможува да даваме отчет пред пратениците и пред граѓаните. Ќе ја почитувам секоја одлука што ќе ја донесе Собранието. Убаво е сите да имаме различни мислења и токму тоа е суштината на демократијата, а би било лошо да има едноумие, систем што го поминале. Среќен сум што има интерпелација за да објасниме некои работи што и беа претставени на јавноста. Ќе образложам се како што било и се надевам дека пратениците ќе одлучат според нивната совест. Имам мирна душа и чиста совест дека со ништо не сум предизвикал таква хистерија во јавноста. Во интерпелацијата во суштина нема ништо дека се прекршени принципите во работењето на Собранието или дека се скратени права на некој пратеник или пратеничка група, туку е за тривијални теми за некои медиуми кои сакаат лајкови и коментари на социјалните мрежи, рече Гаши.
Д. Мишев
