Претседателката на Државната комисија за спречување на корупција, Билјана Ивановска, поради неможноста директно да учествува на конференцијата „Какви избори – таква иднина“ во организација на ЦИВИЛ, даде свој придонес со видео-изјава во која ги пренесе главните информации за улогата на Комисијата во изборните процеси.
„Од денот на донесувањето на Одлуката за распишување на избори до завршување на изборот на Претседател на Република Северна Македонија, како и од денот на донесувањето на Одлуката за распишување на избори за избор на градоначалник, па до завршување на изборите за избор на градоначалник, не може да се започне изградба со средства од буџетот или од јавни фондови или со средства на јавни претпријатија и други правни лица што располагаат со државен капитал – на нови објекти во инфраструктурата, како патишта, водоводи, далноводи, канализација, спортски игралишта и други објекти или објекти за општествени дејности – училишта, градинки и други објекти, освен ако за таа намена претходно се обезбедени средства од буџетот, односно, се работи за реализација на програма донесена врз основа на закон во тековната година“, порача првата антикорупционерка.
„Исто така, не може да се вршат исплаќања на плати, пензии, социјална помош или други исплати и материјални надоместоци од буџетски средства или од средства на јавните фондови кои не се редовни месечни исплати, односно сите едногодишни трансфери и исплати или еднократни трансфери од буџетски средства, или од средства на јавни фондови, ниту да се отуѓува државен капитал, ниту да се потпишуваат колективни договори, како што не може да се започне постапка за вработување на нови лица или постапка за престанок на работен однос во државни и јавни институции, а започнатите постапки се ставаат во мирување, освен во случаи на итни и неодложни работи“, рече во своето видео-обраќање за конференцијата, Ивановска.
Таа додаде дека ДКСК ќе следи дали има јавни настани по повод започнување на изградба или пуштање во употреба на објекти со средства од Буџетот или од јавни фондови, или со средства на јавни претпријатија или други правни лица што располагаат со државен капитал, во инфраструктурата како патишта, водоводи, далноводи, канализација, спортски игралишта и други објекти или објекти за општествени дејности училишта, градинки и други објекти што е забрането со закон.
„Забрането е вршење и обид за вршење притисок и заплашување на гласачи или членови на нивните семејства или ним блиски лица. Државната комисија за спречување на корупцијата ќе ja следи изборната кампања на сите кандидати и во случаите на основи за сомневање дека се прекршува законот, ќе презема мерки за утврдување на таквите сомневања, ќе ги извести надлежните органи и ќе бара преземање активности во рамките на нивното надлежно постапување“, изјави Ивановска.
ДКСК објави и форма на Пријава за сомневања за незаконитости и прекршувања во изборниот процес и во изборната кампања на претседателските и локалните избори 2019 година. Ивановска упати апел до секој граѓанин кој има сознание за евентуални прекршувања на одредбите од Изборниот законик за забрана за употреба на буџетски средства, односно забранети дејствија на јавните институции од денот на распишување на изборите, како и во текот на изборната кампања на претседателските и локалните избори 2019 година да ја искористи оваа алатка.
Со оглед дека видео-изјавата на Ивановска беше снимена два дена пред почеток на конференцијата „Какви избори – таква иднина“, таа ги спомна и десетте приговори од ВМРО-ДПМНЕ за користење на канцелариски простор, за одржување на прес-конференција, за асфалтирање на одреден пат, за вработување на повеќе лица во јавно претпријатие, за делење на хуманитарна помош… На денот на одржување на конференцијата, ДКСК имаше седница на која се одлучуваше по овие приговори. Според последните информации, сите приговори на ВМРО-ДПМНЕ се одбиени.
Биљана Јордановска (текст, фотографија и монтажа)
Камера: Дехран Муратов