Од денешните изјави издвојуваме: Пендаровски за македонскиот јазик, Заев за стабилната економска состојба на земјата, Филипче за потребата од строги мерки, Шилегов за мерките во јавниот градски превоз.
Пендаровски: Обединети стоиме во одбрана на македонскиот јазик
Негувањето и афирмацијата на македонскиот јазик не е само долг кон делото на академикот Блаже Конески, туку и долг кон самите себеси, кон сите наши предци и кон идните генерации, порача денеска претседателот Стево Пендаровски на промоција на поштенска марка со ликот на Блаже Конески, во рамки на одбележувањето на јубилејот-100 години од неговото раѓање.
Заев: Нема економски калкулации заради здравствени аспекти
„Нема економски калкулации заради здравствените аспекти. Здравјето пред се и над се. Државата е стабилна финансиски, ликвидна е финансиски и немаме предрасуди се што треба да направиме да го осигураме здравјето на граѓаните. Ама да носите пред време мерки и да правите штета на економијата нема потреба. Се носат мерки тогаш кога треба, еве денеска треба. А ќе има и одлуки за поддршка на бизнисите кои ќе бидат засегнати од новите мерки. Никој нема да биде оставен сам, ова е држава за сите.“, изјави премиерот Зоран Заев на прес конференцијата
Филипче: Дополнителните рестриктивни мерки се со цел епидемиолошката слика дополнително да стивне
– Празниците кои доаѓаат дополнително може да ја комплицираат епидемиолошката ситуација и во таа смисла не сакаме да дозволиме во продолжение на целиот тој период се случи дополнително оптоварување на здравствениот систем, нешто што веројатно тогаш тешко би можеле да го изменаџираме. Во таа смисла се сите овие дополнителни рестриктивни мерки со цел епидемиолошката слика дополнително да стивне, изјави министерот за здравство, д-р Филипче на прес-конференцијата.
Шилегов: Автобусите се исполнети до 75 проценти, каде има потреба го засилуваме превозот
Автобусите се полни согласно препораките на Комисијата за заразни болести, до 75 проценти. Онаму каде гледаме дека има потреба да се интервенира, го засилуваме превозот. Но, апсолутно има доволно контроли, зголемени се и бројот на казните и патници кои не ги плаќаат билетите, рече денеска градоначалникот на Град Скопје, Петре Шилегов.
– Онаму каде што гледаме дека има потреба да се интервенира, го појачуваме превозот. Ние ги влечеме параметрите секојдневно, буквално секој ден, од аспект на број на билети и патници. Се уште превезуваме за околу 60 проценти помалку патници, отколку што сме превезувале пред пандемијата, рече градоначалникот на прес-конференција во одговор на новинарско прашање околу непочитувањето на антиковид мерките во автобусите.
