Израелските дипломати ги искористија своите платформи во ОН за да ја осудат светската организација од почетокот на војната. Кон крајот на октомври, генералниот секретар на ОН Антонио Гутереш одржа обраќање во кое „недвосмислено“ го осуди нападот на Хамас, но рече дека тоа не се случило „во вакуум“ и дека Палестинците биле „подложени на 56 години задушувачка окупација“, од страна на Израел, што ги ескалира тензиите.
Израел ќе престане автоматски да им дава визи на работниците на Обединетите нации, изјави израелскиот владин портпарол во вторникот, додавајќи дека земјата наместо тоа ќе ги обработува барањата од случај до случај.
Говорејќи на брифинг со новинарите, портпаролот на израелската влада Ејлон Леви изјави: „Предолго меѓународните претставници ја префрлаат вината врз Израел, за да го прикријат фактот дека го прикриваат Хамас“, пренесува Си-Ен-Ен.
Карактеризирајќи ја најавата како „апдејт на длабоко проблематичното вклучување на Обединетите нации во овој конфликт“, Леви истакна дека ОН не успеале да го осудат Хамас за киднапирање на помош и за водење војна од болниците.
„Тие беа соучесници во стратегијата на Хамас за човечки штитови“, рече тој.
Леви рече дека ОН го разочарале светот и дека Израел со пример ќе побара поголема одговорност од меѓународното тело.
На почетокот на овој месец, Израел и ја укина визата на Лин Хејстингс, хуманитарен координатор на Обединетите нации, поради „пристрасноста на ОН“. Неколку дена подоцна, Гутереш се повика на ретко користената моќ во Советот за безбедност во неговиот решителен притисок за прекин на огнот во Газа, што предизвика бес кај израелските дипломати.
Д. Т.
