Израелскиот министер за одбрана, Израел Кац, во средата објави големо проширување на воената операција во Газа, што вклучува заземање на големи површини земја што ќе бидат „инкорпорирани во безбедносните зони на Израел“, објави Си-ен-ен, пренесува ЦивилМедиа.
Во изјавата, Кац рече дека операцијата ќе вклучи и „голема евакуација на населението во Газа од борбените зони“, без да прецизира детали.
Според соопштението, воената операција ќе се прошири за „да ја уништи и исчисти областа од терористи и терористичка инфраструктура, истовремено заземајќи големи области кои ќе бидат инкорпорирани во безбедносната зона на Израел“.
Портпаролот на израелската војска преку арапските медиуми доцна во вторникот им нареди на жителите во јужната област Рафа во Газа да ги напуштат своите домови и да се преселат на север.
Минатиот месец, израелски функционер и втор извор запознаен со ова, изјавија за Си-Ен-Ен дека Израел прави планови за потенцијална голема копнена офанзива во Газа што ќе вклучи испраќање десетици илјади војници во борба за расчистување и окупирање на големи делови од енклавата.
Во изјавата на Кац во средата не беше прецизирано дали дополнителни израелски трупи ќе бидат вклучени во проширената операција.
Д. Мишев
