Дваесет Палестинци, меѓу кои 10 деца, беа убиени, а неколку други беа повредени од рано во неделата во израелските воздушни напади низ северниот и јужниот дел на Газа на првиот ден од Рамазан Бајрам, пбјави агенцијата Анадолу.
Очевидци изјавија за Анадолу дека израелските воздушни напади биле насочени кон домови, засолниште со шатори и цивилни возила во градот Газа, Џабалија на север и Кан Јунис на југ.
Седумнаесет луѓе, вклучително и осум деца, загинаа кога израелските напади погодија неколку области, вклучително и семејна куќа во градот Бани Сухеила, источно од Кан Јунис, и шатор во кој се засолнуваат раселените семејства во Кизан Расван, јужно од градот, според медицински извори.
Израелските тенкови и артилерија, исто така, ги нападнаа источните области на Абасан ал-Кабира, источно од Кан Јунис, со истрели во станбени куќи, додаваат тие.
Во градот Газа, еден Палестинец загина, а други беа ранети кога израелски воени авиони нападнаа три цивилни возила во населбата Туфах, соопштија медицинските лица.
Во северниот дел на Газа, две млади девојки беа убиени, а неколку други беа повредени откако израелски борбени авиони ја бомбардираа куќата на семејството Макбел во областа Џурн во Џабалија, додаваат тие.
Во услови на немилосрдно израелско бомбардирање, стотици илјади Палестинци во Газа извршија молитва за Бајрам над урнатините на уништените џамии, во засолништата за раселените и покрај урнатините на нивните домови.
Д. Мишев
