Истражувањето за степенот на отвореност на институциите во шест земји од регионот, во рамки на проектот ACTION SEE – Одговорност, Технологија и Мрежа на институционална отвореност во Југоисточна Европа, што го спроведува Фондацијата за интернет и општество „Метаморфозис“, покажа дека степенот на отвореност на извршната власт во Македонија е на најниско ниво споредено со Србија, Црна Гора, Албанија, Косово и Босна и Херцеговина!
Според резутатите од истражувањето, просечната отвореност на извршната власт, вклучувајќи ја владата, министерствата и другите извршни органи, во регионот изнесува 47%, додека во Македонија нивото на отвореност изнесува 36% од индикаторите!
Според индексот, според отвореноста само на Владата невклучувајќи ги министерствата и извршните агенции, Македонија е исто така, на последно место во регионот и изнесува само 52% – исполнување на индикаторите.
Отвореноста на министерствата во Македонија, исто така, е најниска во регионот и исполнува само 32% од индикаторите. Најслабо рангирано министерство, според отвореноста е Министерството за одбрана, а највисоко котира Министерството за труд и социјална политика.
„Оваа анализа претставува резултат на опсежно истражување, базирано на научна метода, спроведено од членовите на мрежата ACTION SEE, во текот на претходните неколку месеци. Целта на нашите активности е да се утврди вистинската состојба во регионот, преку објективно мерење на отвореноста на извршната власт и да се адресираат препораки за нејзино подобрување. Исто така, цел е да се подобри почитувањето на принципите на доброто владеење, каде отвореноста зазема мошне важно место“, се вели во соопштението.