Одложено е судското рочиште на „Слобода превоз“ и ЈСП по барање на скопското јавно претпријатие поради тоа што не им било готово вештачењето на тужбата.
„Слобода превоз“ во ноември поднесе тужба против ЈСП поради неисплатен долг од околу еден милион евра.
За Ленин Јовановски е очекувано овој процес да се одложува максимално, а адвокатот на ЈСП, кој присуствуваше на судското рочиште, избегна да даде одговор за медиумите.
Наредното судското рочиште е закажано на 9 април.
„Слобода превоз“ пред два месеци известија дека долгот постои и дека тоа го потврдила контролата на УЈП. Имено, како што велат, до нив е доставен записникот од УЈП во кој не се утврдени никакви неправилности и констатации кои водат кон промена на основата за оданочување. При контрола на сметководствената евиденција на претпријатието утврден е вистинскиот долг на ЈСП кон „Слобода Превоз’, кој заклучно со 28.11.2022 г. изнесува 61.821.504 денари.
Скопјани веќе четврт месец имаат проблем со јавниот превоз кој е во тотален хаос бидејќи нема доволно автобуси, а и тие кои сообраќаат низ градот се неисправни.
Поради долгот што ЈСП го има кон приватните превозници и немањето договор за решавање на проблемот, приватните превозници не возат повеќе од три месеци.
Инаку градоначалничката Данела Арсовска преку јавен повик сакаше да обезбеди 100-тина возачи и 50 приватни автобуси, но и двата обиди пропаднаа бидејќи никој не се јави на огласот.
